გავაზის ტყე მასიურად იჩეხება
ყვარლის მუნიციპალიტეტის სოფელ გავაზის მოსახლეობა, 33 ჰექტარი ტყის გასხვისებასა და გაჩეხას აპროტესტებს. გავაზელების თქმით, ადგილს, რომელიც რამდენჯერმე გასხვისდა, საძოვრებად იყენებდნენ. მათი თქმით, იმის გამო, რომ აღნიშნული მიწის ნაკვეთი კერძო პირს უკანონოდ და ფარულად მიჰყიდეს, სოფელს საძოვრები აღარ დარჩა. გავაზელები ადგილობრივ და ცენტრალურ ხელისუფლებას დახმარებას სთხოვენ, წინააღმდეგ შემთხვევაში კი, მასობრივი საპროტესტო აქციებით იმუქრებიან. მოსახლეობის თქმით, საძოვრების არარსებობის გამო, შესაძლოა პირუტყვი, რომელიც მათთვის ერთადერთი შემოსავლის წყაროა, შიმშილით დაიხოცოს. გავაზის მკვიდრ ნათელა გეგელაურის თქმით, გარდა იმისა, რომ სოფელს საძოვარი აღარ აქვს, კერძო მესაკუთრე ტყეში არსებულ ხეებს მასიურად ჩეხს და იქ ვენახის გაშენებას აპირებს. თავდაპირველად გავაზში, 2012 წელს, ფარულად, კერძო პირს 33 ჰექტარი ტყის ფართობი მიჰყიდეს და შემდეგ გასხვისდა. როგორც ყვარლის გამგებლის მოადგილე ოთარ ბუჯიაშვილი ,,კახეთის ხმასთან’’ საუბარში აცხადებს, აღნიშნული მიწის ფართობი ტყის ფონდიდან დიდი ხანია ამოირიცხა და ის ეკონომიკის სამინისტროს ბალანსზე იყო, რომელიც აუქციონის წესით კერძო პირმა, ბიზნესმენმა დავით ოთარაშვილმა შეისყიდა.