თელავის მერია სოციალურად დაუცველი ოჯახებისთვის სათბობი შეშით მომარაგებაზე 16 000 ლარს გამოყოფს
თელავის ვიცე-მერის, თენგიზ მთვარელიშვილის თქმით ზამთრის სეზონისთვის თელავის მერია სოციალურიად დაუცველი ოჯახების სათბობი შეშის მომარაგების მიზნით ბიუჯეტში 16 000 ლარის გამოყოფას გეგმავს: ,,სოციალურად დაუცველ მოქალაქეს, ვისაც შეშის მისაღებად განცხადების დაწერის სურვილი აქვს, მოქალაქეთა მიღების ბიუროს უნდა მიმართოს, რომელსაც შესაბამისი კომისია განიხილავს. მერიაში გახსნილია ცხელი ხაზი (27 36 50), რომელზეც ნებისმიერ მოქალაქეს შეუძლია, დარეკოს და შექმნილი პრობლემის შესახებ განაცხადოს. ამ დროისთვის თელავის მერია მუშაობს ახალი სოციალური პაკეტების შემუშავებაზე. რაც შეეხება ზამთრისთვის გასათბობად საჭირო შეშას, მიიღებს ის ოჯახი, რომელიც ყველაზე გაჭირვებულია,’’ – აცხადებს knews.ge-სთან მთვარელიშვილი.
მოსახლეობის თქმით, წლებია, თელავის მუნიციპალიტეტის გამგეობა სოციალურად დაუცველ ოჯახებს შეშით ეხმარებოდა, მაგრამ, გაუმართავი სისტემისა და ბიუჯეტიდან ამ კუთხით გამოყოფილი არასაკმარისი თანხის გამო, ბოლო წლებში ყველა ვერ მარაგდებოდა:
,,შარშან დავწერე თელავის მუნიციპალიტეტის გამგეობაში განცხადება, მაგრამ შეშა არავის მოუტანია. წელსაც ვფიქრობ, მერიას მივმართო განცხადებით, იქნებ დამეხმარნენ. რამდენიმე დღის წინ ჩემმა ნათესავმა მომიტანა ცოტა ძველი ფიცრები, რომ იმით მაინც გავთბე,’’ – აცხადებს სოციალურად დაუცველი ელენე თუშიშვილი.