ქართული ღვინის ადგილი ევროპაშია- მეღვინეები ეკონომიკის სამინისტროსთან შეიკრიბებიან

„ქართული ღვინის ადგილი ევროპაშია,“ – ამ ლოზუნგით მევენახეები, მეღვინეები, მცირე და დიდი მარნების წარმომადგენლები, სომელიეები და სხვები ეკონომიკის სამინისტროსთან საპროტესტო აქციას გამართავენ.

სფეროს წარმომადგენლები სამინისტროსთან 13 დეკემბერს, 17:00 საათზე შეიკრიბებიან და „ქართული ოცნების“ საგარეო კურსს გააპროტესტებენ. განცხადებაში აღნიშნულია, რომ ევროინტეგრაციის კურსიდან გადახვევა მევენახეობა-მეღვინეობის დარგს დააზიანებს.

„ვიკრიბებით პარასკევს, 13 დეკემბერს, 5 საათზე ეკონომიკისა და მდგრადი განვითარების სამინისტროსთან (იუსტიციის სახლის შენობის ეზო) მევენახეები, მეღვინეები – მცირე, თუ დიდი მარნების წარმომადგენლები, სომელიეები, ღვინის კრიტიკოსები, ღვინის გიდები, ღვინის ბარებისა და მაღაზიების თანამშრომლები.

ვაპროტესტებთ რეჟიმის მიერ უკვე ღიად დეკლარირებულ პოლიტიკას, რომლის შედეგად საქართველო კარგავს ევრო-ატლანტიკურ სივრცეში ინტეგრაციის შესაძლებლობას. ეს კი, როგორც მევენახეობა-მეღვინეობის დარგს, ისე – ზოგადად, ჩვენს სახელმწიფოებრიობასა და თვითმყოფად კულტურას უქმნის ეგზისტენციურ საფრთხეს. ქართულმა ღვინომ, როგორც ათასწლეულების წინ, კვლავ უნდა გაიკვალოს გზა თავის ცივილიზაციურ გარემოში – ევროპულ ოჯახში!“, – აღნიშნულია დაგეგმილ ანონსში.