პატარა ევროპა კახეთში
სიტყვა აისი მზის ამოსვლას ნიშნავს. მზის ამოსვლა სინათლეს და სითბოს. კახეთის ერთ პატარა დაბაში მზე სხვაგვარად ამოდის. უნდა ითქვას, რომ ამ სოფელს საკუთარი ,,აისი აქვს. კაჭრეთის ,,აისი ზამთარ-ზაფხულ ანათებს და ადგილობრივებსაც და სტუმრებსაც მზის სხივივით სითბოს აძლევს.
თუ კაჭრეთის ვენახებით გარშემოტყმულ მაღლობს აუყვებით, მწკრივებში დარგული ხეხილის, სხვადასხვა მცენარეებით გარშემოტყმულ მოვლილ კარჶმიდამოს დაინახავთ, შენობები ლაზათიანად გამოიყურება, აქა-იქ მშენებლობებია გაჩაღებული, ეზო ყვავილარით და ბილიკებით არის მოკირწყლული. ეზოში ახალგაზრდები და მუშები ფუსფუსებენ, ირგვლივ სკებია, ვენახები, მარანი, ფრინველისა და ძროხების ფერმები, ეზოში ფარშევანგები, კატები და იხვები და¬სეირნობენ და სასწავლო კორპუსები ღია ბაღებით ისეა მიწყობილი ერთმა¬ეთს, ძნელია წარმოიდგინო, რომ მოქმედების ადგილი საქართველოა და ეს ყველაფერი კახეთის პატარა სოფლის გარეუბანში ხდება. სწორედ აქ არის ,,აისი – იგივე საზოგადოებრივი კოლეჯი, რომელიც უწინდელი პროფესიული სასწავლებლის ბაზაზე შეიქმნა და ამჟამად ყოველწლიურად 1000 ზე მეტი სტუდენტი იღებს პროფესიულ განათლებას. თუ ვინმეს ფერმის გახსნა გსურთ და კვალიფიციურ ფერმერს ეძებთ, მაშინ ,,აისი თქვენთვისაა, თუ გინდათ რომ მეხილეობა, მებაღეობა, მეფუტკრეობა და მეღ¬ვინეობა განავითაროთ, სწორედ აქ იპოვით საჭირო კადრებს.
გთავაზობთ ინტერვიუს კოლეჯის დირექტორის მოადგილესთან თინათინ ხანჯალიაშვილთან.
– რა კონკრეტული პროფესიული საგანმანათლებლო მიმართულებები მუშაობს კოლეჯ „აისში“?
-ისტორიულად საქართველოში სახალხო მეურნეობის დარგებს შორის ერთ-ერთი წამყვანი ადგილი ყოველთვის აგრარულ მიმართულებას ეჭირა. 21-ე საუკუნეში აგრარული სექტორის განვითარება შეუძლებელია ამ დარგის მაღალკვალიფიციური კადრების გარეშე, რომელთა დეფიციტი საქართველოში თვალშისაცემია. აღნიშნული დეფიციტის შევსება შესაძლებელია იმ პროფესიული საგანმანათლებლო პროგრამების განხორციელებით, რომელშიც აქტიურად არის ჩართული სსიპ საზოგადოებრივი კოლეჯი „აისი“; უკვე წლებია, საქართველოს ეროვნული ინტერესების და აგრარული პოლიტიკის გათვალისწინებით, კოლეჯში მიმდინარეობს შემდეგი სპეციალობების შესწავლა: მევენახე-მეღვინე, მეფუტკრე, ვეტერინარული მომსახურების სპეციალისტი, ხილ-ბოსტნეულის გადამმუშავებელი, მეხილე, მზარეული და ფერმერი. კოლეჯში ასევე ტურიზმის სფეროს ისეთი მოთხოვნადი სპეციალობის პროგრამები ხორციელდება, როგორიცაა საქართველოს ისტორიული მემკვიდრეობის გიდი, ტუროპერატორი და სასტუმრო საქმის მწარმოებელი. ამ მიმართულებით საქართველოს განათლების და მეცნიერების სამინისტროს ხელშეწყობით შექმნილია უნიკალური სასწავლო ბაზები და აქ მოსული სტუდენტი მაღალკვალიფიციური პროფესიონალის სახით უბრუნდება საქართველოს შრომის ბაზარს.
– როგორია კოლეჯის ბაზა და რა რესურსები არსებობს სტუდენტთა პრაქტიკული სწავლების მიმართულებით?
-სსიპ საზოგადოებრივი კოლეჯი „აისი“ არის თანამედროვე სტანდარტებით აღჭურვილი პროფესიულ საგანმანათლებლო დაწესებულება, სადაც სხვადასხვა სპეციალობების სტუდენტები თეორიული სწავლების კურსს გადიან სათანადოდ აღჭურვილ აუდიტორიებში, პრაქტიკული მეცადინეობები მიმდინარეობს სპეციალურად მოწყობილ ბაზებზე. აღსანიშნავია, რომ კოლეჯს გააჩნია ყველა სპეციალობის შესაბამისი მატერიალურ-ტექნიკური ბაზა: ღვინის მინი საწარმო, ტრადიციული მარანი, ვენახი, ღვინის ლაბორატორია, ფუტკრის სახლი, მეცხოველეობის ფერმა, ხეხილის ბაღი, სათბური, სანერგე და ხილ-ბოსტნეულის გადამამუშავებელი მინი საწარმო. აქვეა მაღალი ტექნოლოგიებით აღჭურვილი სადურგლო სახელოსნო, სამზარეულო, ფილათმწყობის სახელოსნო და სხვ. კოლეჯ „აისში“ ყველა პროფესიას ასწავლის მასწავლებელთა მაღალკვალიფიციური გუნდი, რომელთა კვალიფიკაციის ამაღლება მიმდინარეობს სისტემატიურად. საქართველოს განათლებისა და მეცნიერების სამინისტროს ინიციატივით მათთვის ეწყობა ტრენინგები, რომელსაც უძღვებიან კონკრეტული სფეროს პროფესორ-მასწავლებლები და უცხოელი ტრენერები. სასწავლებელს ასევე აქვს საკუთარი კარგი პრაქტიკა მასწავლებელთა პროფესიული განვითარების კუთხით. ეს არის მასწავლებელთა პროფესიული განვითარების კლუბი „წინსვლა“. აღნიშნული კლუბის ინიციატივით კოლეჯში ყოველწლიურად ეწყობა პროფესიული კვირეულები, რომლის ფარგლებშიც კოლეჯის სტუდენტებისა და მასწავლებლებისთვის უამრავი საინტერესო ღონისძიება იმართება. მასწავლებლების მუშაობა თვითგანვითარებაზე ამ კლუბის ფარგლებში კიდევ უფრო ინტენსიურად და საინტერესოდ წარიმართება. კოლეჯი „აისი“ თავის მხრივ ზრუნავს სტუდენტის განვითარებაზე. სასწავლო პროცესი მიმდინარეობს სტუდენტებთან მჭიდრო ურთიერთობით. ისინი მონაწილეობას იღებენ სხვადასხვა ტრეინინგბეში, სოციოლოგიურ გამოკითხვებში, შემეცნებით და კულტურულ ღონისძიებებში, ტარდება პროგრამების პრეზენტაციები და მასტერკლასები, რომლებსაც უძღვებიან დარგის უმაღლესი დონის სპეციალისტები, პროფესორები, საქართველოს წამყვანი უნივერსიტეტების ლექტორები.
– შრომითი ბაზარი რეგიონში მწირია და, სამწუხაროდ, მცირე სამუშაო ადგილებს სთავზობს ახალგაზარდებს. რა მექანიზმები არსებობს პროფესიული განათლების შემდგომი დასაქმების ხელშეწყობისათვის.
-სტუდენტი საკვალიფიკაციო გამოცდის წარმატებით ჩაბარების შემდეგ იღებს სახელმწიფო დიპლომს. კურსდამთავრებულთა დასაქმების უზრუნველსაყოფად აქტიურად ხორციელდება თანამშრომლობა პოტენციურ დამსაქმებელთან. ყოველწლიურად ფორმდება ურთიერთთანამშრომლობის მემორანდუმები კოლეჯ „აისსა“ და იმ საწარმოებსა და ორგანიზაციებს შორის, სადაც სტუდენტები გადიან საწარმოო პრაქტიკას. ეწყობა შეხვედრები დამსაქმებლებსა და სტუდენტებს შორის, სადაც მიმდინარეობს დისკუსიები იმ პრობლემებზე, სიახლეებსა და გამოწვევებზე, რაც კონკრეტულად აინტერესებს როგორც დამსაქმებელს, ასევე სტუდენტს. სსიპ საზოგადოებრივ კოლეჯ „აისს“ ბევრ კომპანიასთან აქვს გაფორმებული ურთიერთთანამშრომლობის მემორანდუმი, რომელთა შორის აღსანიშნავია: საქართველოს საერთაშორისო ენერგეტიკული კორპორაცია „ალაზანჰესი“, შპს „ბრეტი“, შპს „ზედაშე“, შპს ქინძმარაულის მარანი, ჯეო ტურიზმი, შპს „ავანგარდი“ და სხვები. აქტიურად მიმდინარეობს მოლაპარაკებები სხვა კომპანიებთანაც.
სსიპ საზოგადოებრივი კოლეჯი „აისი“ ორიენტირებულია აღზარდოს თანამედროვე მოთხოვნების შესაბამისი კომპეტენციის მქონე მაღალკვალიფიციური და კონკურენტუნარიანი სპეციალისტი, რომელიც ამავე დროს იქნება მაღალი მოქალაქეობრივი შეგნების მქონე პიროვნება. ყოველწლიურად კოლეჯ „აისის“ კურსდამთავრებულთა 60% წარმატებით საქმდება და დამსაქმებელთა დიდი ნაწილი მადლობას გამოხატვს კვალიფიციური კადრებისთვის. ეს ფაქტი კიდევ უფრო ზრდის კოლეჯ „აისის“ როლს ქვეყნის აგრარული სექტორის განვითარებაში.
– ცნობილია, რომ კოლეჯი ფართოვდება და სხვა მუნიციპალიტეტებშიც აპირებთ პროგრამების განხორციელებას. მოგვიყევით ამის შესახებ.
-სსიპ საზოგადოებრივი კოლეჯი „აისი“ წარმოდგენილია კაჭრეთის, დედოფლისწყაროს და ალვანის განყოფილებებით, რომელთაც 2015 წელს ლაგოდეხის განყოფილებაც შემოუერთდა. საქართველოს დგანათლების და მეცნიერების სამინისტროს მიერ ამ ეტაპზე სრულად რეაბილიტირბული და აღჭურვილია კოლეჯის კაჭრეთის, ალვანისა და დედოფლისწყაროს განყოფილებები. ლაგოდეხის განყოფილებასთან მიმართებაში ამ ეტაპზე წინა-სარეაბილიტაციო სამუშაოები მიმდინარეობს და კოლეჯის სრული რეაბილიტაცია-აღჭურვის შემდეგ აქ მუნიციპალიტეტის სპეციფიკაზე მორგებული პროფესიული მიმართულების ახალი სასწავლო პროგრამები დაინერგება.
სსიპ საზოგადოებრივი კოლეჯში „აისი“ სწავლებას სახელმწიფო აფინანსებს. სტუდენტები სწავლობენ როგორც დღის, ასევე საღამოს ცვლაში. ამასთან, კოლეჯის კაჭრეთის განყოფილება საქართველოს სხვადასხვა კუთხიდან ჩამოსულ სტუდენტებს კეთილმოწყობილი და უფასო საერთო საცხოვრებლით უზრუნველყოფს. სსიპ საზოგადოებრივ კოლეჯში „აისი“ ყოველწლიურად სხვადასხვა პროფესიაზე ცხადდება საგაზაფხულო და საშემოდგომო მიღება. აპლიკანტთა ასაკი შეუზღუდავია 16 წელს გადაცილებულ პირთათვის. ამგვარად, დაინტერესებულ პირებს, შეუძლიათ თვალი ადევნონ კოლეჯის ფაცებოოკ გვერდსა (მოძებნეთ – საზოგადოებრივი კოლეჯი აისი) და ჩვენს ვებ გვერდს (www. collegeaisi.ge) და მიიღონ ყველა საჭირო ინფორმაცია საკონტაქტო ინფორმაციის ჩათვლით.
ბიბერახი – თელავის პარტნიორობის კომიტეტი ახორციელებს მასშტაბურ საგანმანათლებლო პროგრამას. პროექტის ფინანსურ მხარდაჭერას უზრუნველყოფს GIZ გერმანიის ტექნიკური თანამშრომლობის ფონდი, ,,კავკასიის ქალაქთა ქსელის მცირებიუჯეტიანი პროექტების ფარგლებში გერმანიის განვითარებისა და თანამშრომლობის სამინისტრო.
მხარდამჭერები: მეცნიერების და განათლების სამინისტრო, სპორტისა და ახალგაზრდობის სამინისტრო , შრომის, ჯანმრთელობის და სოციალური დაცვის სამინისტრო. სკოლები, რესურს ცენტრები, უნივერსიტეტი და პროფესიული კოლეჯები, არასამთავრობო სექტორი, სამთავრობო წარმომადგენლობა (გუბერნია და თელავის, ახმეტის, გურჯაანისა და ყვარლის მუნიციპალიტეტები და საკრებულოები) და რეგიონის ბიზნესის ფართო სპექტრი. თელავი გამოფენის მასპინძელია. პროექტები 2004 წლიდან დაიწყო: თელავის რუკა, პირველი მუსიკალური სკოლის აღდგენა, საბაკალავრო სასწავლო პროგრამა – პროექტის მენეჯმენტი (სამშენებლო და მცირე ბიზნესის მენეჯმენტი), საყოფაცხოვრებო ნარჩენები/დასუფთავება და პროფესიული საგანმანათლებლო პროგრამის გაუმჯობესება.
