სოფელ შალაურში ახლადგახსნილი სასტუმრო „სეროდანი“ საქმიანობის გაფართოვებას გეგმავს

თელავთან ახლოს, სოფელ შალაურში ახლადგახსნილი სასტუმრო „სეროდანი“ მიმდინარე წელს კოტეჯების დამატებასა და ინფრასტრუქტურის განვითარებას გეგმავს.

როგორც სასტუმროს დამფუძნებელი, ზურაბ მოდებაძე BM.GE-სთან აცხადებს, სასტუმრო 2023 წლის ბოლოს გაიხსნა და ის ხის კოტეჯებთან ერთად, სარესტორნო სივრცესა და ღია ტიპის ორ აუზს როგორც უფროსებისთვის, ისე ბავშვებისთვის აერთიანებს. მისი თქმით, სასტუმროს სრულად მოწყობაში 2 მილიონი ლარის ინვესტიცია განხორციელდა.

„სეროდანი“ დამსვენებელს ეკოლოგიურად სუფთა გარემოში მშვიდ და კომფორტულ დასვენებას სთავაზობს და საუკეთესო ადგილია ქალაქის ხმაურისგან თავის დასაღწევად. სასტუმროს ტერიტორიიდან იშლება ალაზნის ველისა და კავკასიონის ულამაზესი ხედები“,- განაცხადა ზურაბ მოდებაძემ.

მისივე თქმით, სასტუმროში ნომრები 2 და 4-ადგილიანი კოტეჯების სახითაა წარმოდგენილი და ჯამში 30 ადამიანის განთავსებაა შესაძლებელი. რაც შეეხება სამომავლო გეგმებს, ზურაბ მოდებაძემ განაცხადა, რომ მიმდინარე წელს, სასტუმროს ტერიტორიაზე კიდევ რამდენიმე კოტეჯის დამატება და ინფრასტრუქტურის განვითარება იგეგმება:

“მათ შორის, სასტუმროს ტერიტორიაზე სათავგადასავლო მარშრუტების მოწყობა, საბავშვო სივრცეების დამატება და სხვა”- აცხადებს ზურაბ მოდებაძე. რაც შეეხება დასაქმებულებს, მისი თქმით, სასტუმროში ამ ეტაპზე 20 ადამიანი მუშაობს.