ხელმოწერების კამპანიას „ჩვენი ხმა ევროპას“ ყვარლის ახალგაზრდობა შეუერთდა

საქართველოს პრეზიდენტი დღეს „ყვარლის ევროკლუბის” დაარსების 4 წლისთავისადმი მიძღვნილ საზეიმო ღონისძიებას დაესწრო და იმ ახალგაზრდებს შეხვდა, რომლებიც ხელმოწერების კამპანიას შეუერთდნენ და კიდევ ერთხელ გამოხატეს საკუთარი მხარდაჭერა ევროპული გზის მიმართ.

ამის შესახებ ინფორმაციას პრეზიდენტის ადმინისტრაცია ავრცელებს.

მათივე ცნობით, ღონისძიებას ამერიკის ელჩი, ევროკავშირის საელჩოსა და დიპლომატიური კორპუსის წარმომადგენლები ესწრებოდნენ.

,,ძალიან მნიშვნელოვანია ჩემთვის თქვენს წინაშე გამოსვლა ამ დღეს, როცა თქვენი ორგანიზაციის მეოთხე წლისთავს ვზეიმობთ. ასეთი წამოწყება არის სწორედ ის, რაც ჩვენს ქვეყანას ყველაზე მეტად სჭირდება რათა ჩვენი მიზანი – ილიას ევროპული გზა იყოს მიღწეული, ამისთვის კი ყველას ჩართულობაა საჭირო: მთავრობა, ლიდერები, მოდიან და მიდიან, მაგრამ რჩება საზოგადოება და საზოგადოება თუ თავის თავში დარწმუნებულია, თუ საზოგადოებამ იცის რეალურად როგორი მომავალი უნდა, რა უნდა თავისი შვილებისთვის, მომავალი თაობისთვის, მაშინ ის საზოგადოება მიაღწევს თავისას და ეს იწყება ყოველივე ქალაქში, სოფელში, თემში, იქიდან წამოწყებული ყველა ინიციატივა ყველაზე ძლიერია და საქართველოს ისტორიამ ეს ძალიან კარგად იცის, რომ ყველაზე რთულ პერიოდებში სწორედ იმიტომ გადარჩა, რომ ყველა ადგილს ჰქონდა ეს თავისი ძალა, თავისი იდენტობა, ეს თავდაჯერებულობა და შეიძლება რაღაც პერიოდებში არ იყო რაღაც ცენტრალური მმართველობა, რომელიც ყველაფერს განაგებდა, მაგრამ იყვნენ ადგილობრივი ძალები, რომლებიც გადაურჩნენ, ზოგჯერ შეეგუენ ძალიან რთულ პირობებს, მაგრამ ზოგჯერ ერთობლივი იყო ეს გზა და ერთობლივი იყო ის გზა რაზედაც მივდიოდით და დღესაც მივდივართ.

ეს მხოლოდ იმის გამოხატულებაა, რომ ეს საზოგადოება ამაში მაინც არის ერთიანი, რომ ეს საზოგადოება ამ საკითხში ძლიერად დგას და სწამს ამ მომავლის. და მე ვხედავ აქ ახალგაზრდების თვალებში, რომ სწორედ ეს იქნება ჩვენი მომავალი და მე ამის მჯერა!“, – განაცხადა საქართველოს პრეზიდენტმა, სალომე ზურაბიშვილმა.