“ყურძნის სუბსიდირების პროგრამა ყელით თოკზე ჩამოკიდების ტოლფასია” – “ვაზისუბნის მამული”

კომპანიაში “ვაზისუბნის მამული” აცხადებენ, რომ წელს განსაკუთრებულად მოხშირებული სტიქიური მოვლენების გამო, ყურძნის მოსავალი შემცირებულია, რაც გავლენას ღვინის წარმადობაზეც მოახდენს. ამ საკითხზე BM.GE-სთან ღვინის მწარმოებელმა “ვაზისუბნის მამულის” გაყიდვების მენეჯერმა, გიორგი ოქროაშვილმა ისაუბრა.

“ჩვენ ყურძენს არ ვიბარებთ, 35 ჰა ვენახი გვაქვს სოფელ ვაზისუბნის მამულში, გურჯაანში, და მხოლოდ ჩვენი ყურძნისგან ვაკეთებთ ღვინოს, რაც ხარისხის შენარჩუნებისთვის ძალიან მნიშვნელოვანია. მიუხედავად იმისა, რომ სტიქიამ ძალიან დაგვაზარალა, დიდი რაოდენობის სიტყვას ვებრძოლეთ, ჩვენი ახლებური მიდგომისა და გუნდის პროფესიონალიზმის დახმარებით, შევძელით, შეგვენარჩუნებინა მოსავალი და ხარისხი. თუმცა, რომ არა სეტყვა და ამხელა სტიქია, უფრო მეტსაც შევძლებდით. გვაქვს მარაგები, რომლებსაც ვარეზერვებთ და წლების განმავლობაში უმჯობესდება, ამიტომ წარმადობის პრობლემა ჩვენს კომპანიას არ შეექმნება”, – ამბობს გიორგი ოქროაშვილი.

სტიქიით გაფუჭებული ყურძნის მოსავლისთვის სახელმწიფო ყოველწლიურად ყურძნის სუბსიდირების პროგრამას ატარებს და გაფუჭებულ ყურძენს გარკვეული თანხის სანაცვლოდ ყიდულობს. გიორგი ოქროაშვილის შეფასებით, ყურძნის სუბსიდირება ღვინის წარმოების საბოლოო სურათს აფუჭებს.

“ყურძნის სუბსიდირების პროგრამა ყელით თოკზე ჩამოკიდების ტოლფასია, როგორც ქვეყნის, ისე ბიუჯეტის, მეღვინეების და ყველასი. როდესაც ფერმერი ორიენტირებულია ისევ და ისევ რაოდენობაზე, რომ ნებისმიერი ხარისხის ყურძენი მიიღოს, მთავარია, რაოდენობა იყოს ბევრი, ბევრი კილოგრამი ჩააბაროს და ბევრ კილოგრამში ბევრი ფული აიღოს მთავრობისგან, ეს რა თქმა უნდა, ხარისხზე პირდაპირ მოქმედებს.

ჩვენ როდესაც მწვანე რთველს ვაკეთებთ, ვჭრით მტევნებს და მხოლოდ კარგ მტევნებს ვტოვებთ, ჯამში შეიძლება 50%-იც კი მოვჭრათ და ვენახის ნახევარი დავტოვით, რომელმაც შემდეგ მაღალი ხარისხი უნდა მოგვცეს. ამას ის მევენახე, რომელმაც იცის, რომ კილოგრამებზეა დამოკიდებული რამდენს გადაუხდის მთავრობა, არ გააკეთებს და მოიყვანს ბევრ უხარისხო ყურძენს, რაც საბოლოო სურათს აფუჭებს.სახელმწიფოსას, ის უხარისხო ყურძენი რაში სჭირდება, დღემდე ვერ ვხვდები”, – ამბობს გიორგი ოქროაშვილი.

წელს, სახელმწიფო ყურძენს, დაახლოებით, 60 მილიონი ლარით დაასუბსიდირებს. მთავრობის გადაწყვეტილებით, სახელმწიფო სტიქიით დაზარალებულ მევენახეებს დაზიანებულ 1 ჰექტარზე 3 500 ლარს დახმარების სახითაც გამოუყოფს.

“ვაზისუბნის მამული” 15-მდე დასახელების პრემიუმ ხარისხის ღვინოს, მათ შორის ტრადიციულ ქვევრისა და კლასიკურ ბოთლის ღვინოებს აწარმოებს. “ვაზისუბნის მამული” ასევე Georgian Sun-ის ქვებრენდითაც ოპერირებს, რომლის ფარგლებშიც ექსპერიმენტულ ღვინოებს ბაზარზე ხელმისაწვდომ ფასად ყიდის.