“გავუფრთხილდეთ დედამიწას”-კურდღელაურის საჯარო სკოლაში ღონისძიება გაიმართა
თელავის მუნიციპალიტეტის სოფელ კურდღელაურის საჯარო სკოლის მოსწავლეების ინიციატივით, დედამიწის დღესთან დაკავშირებით ღონისძიება გაიმართა.
ღონისძიების ფარგლებში, ახალგაზრდებმა წარმოადგინეს დედამიწის დაცვის თემაზე საკუთარი ხელით შესრულებული ნახატები და პოსტერები. მათ ასევე ისაუბრეს თუ რამდენად მნიშვნელოვანია, რომ დავიცვათ და გავუფრთხილდეთ პლანეტას და რამხელა საფრთხის წინაშე დგას ის.
ღონისძიებაზე ასევე მოსწავლეებმა ყურადღება გაამახვილეს იმაზე თუ როგორ შეიძლება გარემოზე ზრუნვა და ამით არსებული საფრთხის შემცირება. აქტივობის მონაწილეებმა დამსწრეებს მიაწოდეს ინფორმაცია იმასთან დაკავშირებით თუ როგორ ხდება ნარჩენების გადამუშავება და რამხელა დადებით როლს ასრულებს ეს გარემოს დაცვისთვის.
ღონისძიების ფარგლებში ასევე ახალგაზრდების მიერ მოეწყო პატარა სპექტაკლი, სადაც ნათლად იყო წარმოჩენილი თუ რა პრობლემების წინაშე დგას დღეს დედამიწა და რამდენად სჭირდება მას ადამიანების დახმარება.
ავტორი: ნანუკა ნაბორაშვილი