თელავის სასამართლომ ბებიის გაუპატიურების ბრალდებით დაკავებულს პატიმრობა შეუფარდა

კახეთში, ბებიის მიმართ ჩადენილი სექსუალური ხასიათის დანაშაულში ბრალდებულს, კიდევ ერთ უმძიმეს მუხლს, თავისუფლების უკანონო აღკვეთასაც ედავებიან. თელავის რაიონულმა სასამართლომ დაკავებულს აღკვეთის ღონისძიების სახით პატიმრობა შეუფარდა.

“პრაიმტაიმის” ინფორმაციით, ჩვენებაში, რომელიც 77 წლის ქალმა გამოძიებას მისცა, ნათქვამია, რომ 26 წლის შვილიშვილი მას ღამით სახლში კეტავდა და კარს დილით უღებდა. მომხდარ ფაქტზე, უკვე დანიშნულია შესაბამისი ექსპერტიზა, რომელმაც ბებიის მიმართ, მამაკაცის მიერ ჩადენილი სექსუალური ხასიათის დანაშაულის სახე უნდა დაადგინოს, ან ბრალის გაუპატიურებად გადაკვალიფიცირება გამოიწვიოს.

არსებული ინფორმაციით, ბრალდებული ჩადენილ დანაშაულს არ აღიარებს და წარდგენილ ბრალს არ ეთანხმება. გამოძიება მომხდარ ფაქტზე, სისხლის სამართლის კოდექსის 143-ე, თავისუფლების უკანონო აღკვეთის და 138-ე მუხლით დაიწყო, რაც სექსუალური ხასიათის სხვაგვარ ქმედებას გულისხმობს.

არსებული ინფორმაციით, ახალგაზრდა კაცი წარსულში მკვლელობის მცდელობისა და შემდეგ, ძარცვისთვის არის ნასამართლევი. ბებიის მიმართ დანაშაულის ჩადენის დროს, ის პირობითი მსჯავრის ქვეშ იმყოფებოდა.

შემზარავი დანაშაულის შესახებ ცნობილი გუშინ გახდა – თელავის მუნიციპალიტეტის ერთ-ერთ სოფელში 26 წლის ბიჭი ბებიაზე სისტემატიურად ძალადობდა. ფაქტის შესახებ მას შემდეგ გახდა ცნობილი, რაც მოძალადის მამა შეესწრო 77 წლის დედის გაუპატიურებას და პოლიციას აცნობა. ვრცელდება ინფორმაცია, რომ ბრალდებულს ჯანმრთელობის პრობლემები ჰქონდა.