“გვერდზე გადადეთ უთანხმოება და შეიმუშავეთ გეგმა”-დეგნანი ევროკომიის 12 რეკომენდაციაზე

“მიიღეთ რეფორმები, რომელიც ნამდვილად წაიყვანს საქართველოს ევროპული მომავლისკენ”- ეს რჩევა საქართველოში აშშ-ის ელჩმა კელი დეგნანმა პოლიტიკურ ლიდერებსა და სამოქალაქო საზოგადოებას ევროკავშირის კანდიდატის სტატუსის მინიჭებისთვის 12-პუნქტიანი გეგმის შესრულებაზე საუბრისას მისცა.

“ფორმულასთან” ინტერვიუში კელი დეგნანმა აღნიშნა, რომ მმართველმა პარტიამ და ოპოზიციამ გვერდზე უნდა გადადონ უთანხმოება და გაერთიანდნენ, რადგან ევროპული მომავლისკენ გზა რეფორმებზე გადის. მან ხაზი ევროინტეგრაციის გზაზე კანონების მოდერნიზებასა და ჰარმონიზაციასაც გაუსვა.

“ვფიქრობ, მნიშვნელოვანია კონცენტრაცია 12 რეკომენდაციაზე იყოს გადატანილი. ვხედავთ, რომ მმართველი პარტია და ოპოზიცია, სამუშაო ჯგუფების მეშვეობით რეკომენდაციების განხორციელების საკითხზე მუშაობს. ვფიქრობ, დრო გვიჩვენებს არის თუ არა ამ პროცესის შედეგი ჭეშმარიტად ინკლუზიური, რომელიც ამ რეკომენდაციებს უპასუხებს. ეს არ არის საქართველოს კრიტიკა.

განზე გადადეთ განსხვავებები და გეგმა შეიმუშავეთ, მიიღეთ რეფორმები, რომელიც ნამდვილად წაიყვანს ამ ქვეყანას ევროპული მომავლისკენ. ასე, რომ ეს მნიშვნელოვანი შესაძლებლობაა საქართველოსთვის, რომ მოდერნიზაციისთვის საჭირო ნაბიჯები გადადგას”, – განაცხადა კელი დეგნანმა.

შეგახსენებთ, რომ საქართველომ ევროკავშირის კანდიდატის სტატუსისთვის, 12 მოთხოვნა უნდა შეასრულოს. ევროკომისია ანგარიშს, იმის შესახებ, თუ როგორ შეასრულა საქართველომ ევროკომისიის მიერ გაწერილი 12 რეკომენდაცია, 2023 წლისთვის მოამზადებს.