მართვის მოწმობის გამოცდის რეალურ დროში ჩაბარება სავალდებულო გახდება

“საგზაო მოძრაობის შესახებ კანონში” შესატანი ცვლილებების პროექტის თანახმად, ავტომობილის მართვის პრაქტიკული გამოცდის რეალურ მოძრაობაში ჩაბარება 2022 წლის მარტიდან გახდება სავალდებულო.

ცვლილებების პროექტი პარლამენტის რიგგარეშე სესიაზე შინაგან საქმეთა მინისტრის მოადგილე ალექსანდრე დარახველიძემ წარადგინა.

“ცვლილებები გულისხმობს იმას, რომ თეორიული გამოცდისა და დახურულ მოედანზე გამოცდის ჩაბარებასთან ერთად, რასაც გადის დღეს ნებისმიერი მსურველი, ვისაც სურს მართვის მოწმობის აღება, დამატებით მოუწევს მინისტრის ბრძანებით განსაზღვრულ მარშრუტზე რეალურ პირობებში გამოცდის ჩაბარება. იმისათვის, რომ არ გაჩნდეს კითხვები გამოცდის პირობებში, შემოგვაქვს რეგულაცია, რომლითაც მოხდება სრული გამოცდის ჩაწერა, აუდიო-ვიდეო გადაღება და თუკი გასაჩივრდება კონკრეტული მხარის მხრიდან გამოცდის შედეგები, მას საშუალება ექნება, გაეცნოს გამოცდის ჩაბარების პროცესს”, – აღნიშნა დარახველიძემ.

მან ასევე ისაუბრა მასზედ რომ, ცვლილებების განხორციელების შემდეგ, საზღვარგარეთ მცხოვრები საქართველოს მოქალაქეები, რომლებსაც ექნებათ ქართული მართვის მოწმობა, შეძლებენ ის ევროპული ქვეყნების მართვის მოწმობებში გადაცვალონ.

“18 წლამდე ასაკის პირებს მოგეხსენებათ, რომ დღეს აქვთ უფლება აიღონ მართვის მოწმობა. თუმცა მათ ეკრძალებათ შრომით საქმიანობაში ჩართვა. ეს შეზღუდვა წარმოდგენილი კანონპროექტით იხსნება და სრულად ექნებათ მუშაობის საშუალება, მათ შორის კურიერად და მძღოლად. ვინაიდან დაემატა გამოცდის ახალი პროექტი, B და BE კატეგორიისათვის იქნება 90-ლარიანი გადასახადი. დანარჩენი გადასახდელები, რაც დაკავშირებულია თეორიულ გამოცდასთან და დახურულ მოედანზე გამოცდის ჩაბარებასთან, ამ შემთხვევაში არ იზრდება და კვლავ 40 ლარი იქნება.

ამ თანხის სანაცვლოდ მოქალაქეს საშუალება ექნება, გაიაროს თეორიული გამოცდა და დახურულ მოედანზე 5-ჯერ მიეცემა გამოცდის ჩაბარების შესაძლებლობა.
რაც შეეხება ყველა სხვა კატეგორიას, ქალაქის პირობებში გამოცდის ჩაბარებისათვის გადასახდელი წესდება 150 ლარის ოდენობით და თუ პირი ვერ ჩააბარებს, დაახლოებით 1 წლის განმავლობაში საშუალება ექნება, განმეორებით გავიდეს გამოცდაზე”, – განაცხადა ალქესანდრე დარახველიძემ.

მანვე აღნიშნა, რომ 50%-იანი შეღავათი წესდება სოციალურად დაუცველი პირებისათვის მართვის მოწმობის გამოცდაზე პირველად მონაწილეობის შემთხვევაში, ხოლო 18 წლამდე ასაკის პირები მთლიანად გათავისუფლდებიან გადასახადისგან.

“საგზაო მოძრაობის შესახებ” კანონში შესატანი ცვლილებების პროექტს პარლამენტი დღეს პირველი მოსმენით იხილავს.