FAO – ჯილეხით დაცემული ცხოველის მეპატრონეები კომპენსაციას მიიღებენ

გაერო-ს სურსათისა და სოფლის მეურნეობის ორგანიზაციის (FAO) ინფორმაციით, ფერმერები, რომელთა პირუტყვის დაცემა ჯილეხით იქნება გამოწვეული, სახელმწიფოსგან ფინანსურ კომპენსაციას მიიღებენ.

ორგანიზაციის ცნობით, საქართველოს მთავრობის აღნიშნული დადგენილება უკვე ამოქმედდა, კომპენსაციის გაცემას კი სახელმწიფო 2022 წლიდან დაიწყებს. ცვლილების მიღება საქართველოს გარემოს დაცვისა და სოფლის მეურნეობის სამინისტროს, სურსათის ეროვნული სააგენტოსა და გაეროს სურსათისა და სოფლის მეურნეობის ორგანიზაციის (FAO) ერთობლივი მუშაობის შედეგად გახდა შესაძლებელი.

„დადგენილების თანახმად, 2022 წლის პირველი იანვრიდან, ჯილეხით დაცემულ საქონელზე კომპენსაციის მიღებას შეძლებენ ის ფერმერები, რომელთა პირუტყვიც იდენტიფიცირებულია საყურე ნიშნებით; თუ ინფორმაცია ცხოველისა და ფერმერის შესახებ აღრიცხულია ცხოველთა იდენტიფიკაცია-რეგისტრაციის ელექტრონულ სისტემაში (NAITS) და ფერმერს ცხოველის ვაქცინაციაზე უარი არ აქვს ნათქვამი. ასევე, კომპენსაციის მისაღებად, ცხოველის მფლობელი/მომვლელი ვალდებულია: ცხოველის შესაძლო ინფიცირების ან სიკვდილის შემთხვევაში დაუყოვნებლივ აცნობოს სურსათის ეროვნულ სააგენტოს და მოითხოვოს შესაბამისი ეპიდემიოლოგიური სამუშაოების გატარება.

ახალი კერის წარმოქმნას განაპირობებს დაავადებული ცხოველის დაკვლა, მკვდარი ცხოველის გაკვეთა, პირუტყვის ლეშის გადაგდება და ა.შ. აქედან გამომდინარე დაავადების შემთხვევების დროული გამოვლენა და შესაბამისი უწყებების ინფორმირება უმნიშვნელოვანესია“, – ნათქვამია ინფორმაციაში.

ცხოველთა იდენტიფიკაცია-რეგისტრაციის (NAITS) პროგრამის ხელმძღვანელის, მიხეილ სოხაძის განცხადებით, ახალ სტრატეგიას აქვს ორი მნიშვნელოვანი მიზანი.

„პირველი, ფერმერებმა არ დამალონ ცხოველების დაავადების და დაცემის ფაქტი, რასაც ჩვენი აზრით ხელს შეუწყობს კომპენსაციის მოლოდინი და მეორე, შემცირდეს ის დიდი ზიანი, რომელიც სახელმწიფოს და ფერმერებს ადგება ჯილეხის შემთხვევების შედეგად“, – განაცხადა მიხეილ სოხაძემ.