ვაშლოვანის დაცულ ტერიტორიაზე ხანძარია
დედოფლისწყაროში, ვაშლოვანის დაცულ ტერიტორიაზე კვლავ ხანძარია. როგორც საგანგებო სიტუაციების მართვის სამსახურში აცხადებენ, შემთხვევის ადგილზე უკვე იმყოფებიან მეხანძრე-მაშველები, რომლებიც ტერიტორიაზე ცეცხლის ქრობის პროცესში აქტიურად მონაწილეობენ.
არსებული ინფორმაციით, ცოტა ხანში ხანძარსაწინააღმდეგო სამუშაოებში ჩაერთვება სასაზღვრო პოლიციის ორი ვერტმფრენი. მესაზღვრეებმა დაკვამლიანება დაახლოებით ორი საათის წინ შენიშნეს და შესაბამის სამსახურს შეატყობინეს.
სალიკვიდაციო სამუშაოების განსახორციელებლად სახანძრო-სამაშველო ეკიპაჟებთან ერთად ვაშლოვანის დაცული ტერიტორიების რეინჯერთა ჯგუფიც იმყოფება.
ვაშლოვანის დაცულ ტერიტორიებზე რამდენიმე დღის წინ ხანძრის შედეგად რამდენიმე ჰექტარი ტყის მასივი დაიწვა. ხანძარი მიუვალ ადგილზე გაჩნდა და რთული რელიეფის გამო ცეცხლის ჩაქრობა ცოცხალი ძალით მოხდა.