გურჯაანში კულინარიული სკოლა გაიხსნება

ბასკეთის კულინარიული ცენტრის ხელშეწყობით და პარლამენტის წევრის, მაჟორიტარი დეპუტატის დავით სონღულაშვილის ინიციატივით გურჯაანში გასტრონომიული მიმართულების სკოლა დაფუძნდება, რომელიც კავკასიის უნივერსიტეტთან თანამშრომლობით დაიწყებს ფუნქციონირებას და პროგრამები ხელმისაწვდომი იქნება როგორც ქართველი, ასევე საერთაშორისო სტუდენტებისათვის.

დავით სონღულაშვილის თქმით, სწორედ, ამ მიზნით საქართველოში ბასკეთის კულინარიული ცენტრის გასტრონომიული პროგრამების საერთაშორისო განვითარების მენეჯერი ალბერტო როდრიგეზი იმყოფებოდა, რომლის მიზანს საქართველოს, როგორც გასტრონომიული ტურიზმის ერთ-ერთი ყველაზე მოთხოვნადი და სწრაფად განვითარებადი ქვეყნის კულტურისა და ტრადიციების გაცნობა, ერთობლივი პროგრამების შემუშავება და დანერგვა წარმოადგენდა.
ვიზიტის ფარგლებში, ბასკეთის კულინარიული ცენტრის მენეჯერი ალბერტო როდრიგეზი კახეთს ეწვია, სადაც ტურისტული ობიექტები მოინახულა და კვების ობიექტების შეფ-მზარეულებს შეხვდა.
„კულინარიული სკოლის ირგვლივ ხანგრძლივი მოლაპარაკებები გვქონდა, რომლის შედეგად ბასკეთის კულინარიული აკადემიის წარმომადგენლებს ვუმასპინძლეთ საქართველოში. მნიშვნელოვანია, რომ კულინარიული სკოლა სწორედ გურჯაანში აშენდება. აკადემია დაინტერესებულ პირებს შესთავაზებს ერთობლივ პროფესიულ საგანმანათლებლო პროგრამებს, რომელსაც ბასკეთის აკადემიის წამყვანი შეფები განახორციელებენ.

აღნიშნული მნიშვნელოვნად შეუწყობს ხელს გასტრონომილი ტურიზმის განვითარებას და ქართული გასტრონომიის შესახებ ცნობადობის ამაღლებას მსოფლიო მასშტაბით. ახალ პროექტზე და მომავალ თანამშრომლობაზე განათლებისა და მეცნიერების მინისტრის მოადგილესთან თამარ ქიტიაშვილთან და კავკასიის უნივერსიტეტის წარმომადგენლებთან ერთად შეხვედრა გავმართეთ, რომლის ფარგლებშიც მინისტრის მოადგილემ აღნიშნა, რომ მსოფლიოში ცნობილ გასტრონომიულ სკოლასთან თანამშრომლობა ქვეყნის ტურისტული პოტენციალის რეალიზაციისა და ქვეყნის ცნობადობის გაზრდის თვალსაზრისით უმნიშვნელოვანესია”, – განაცხადა დავით სონღულაშვილმა.

პროექტი, ქალაქ გურჯაანში, კავკასიის უნივერსიტეტისა და საქართველოს განათლების და მეცნიერების სამინისტროს ერთობლივი თანამშრომლობის ფარგლებში განხორციელდება და 2022 წელს სტუდენტების პირველ ნაკადს მიიღებს.