სოფელ ბაკურციხეში ჩინეთიდან ჩამოსულ ქალს ვირუსი დაუდგინდა

ეპიდემიოლოგები და სანიტარული ექიმები, ლაგოდეხის გამშვებ პუნქტზე, აზერბაიჯანიდან საქართველოში შემოსულ მოქალაქეებს, კორონავირუსზე შეამოწმებენ. დაავადებათა კონტროლის ეროვნული ცენტრის თანამშრომლები შემოწმების პროცესს დააკვირდებიან.

„აეროპორტებსა და პორტებში შემოწმება უკვე დაწყებულია. გუშინ დაიწყო შემოწმება გამშვები პუნქტებიდანაც. სანიტარული ექიმები და ეპიდემიოლოგები, ყველა მგზავრს შეამოწმებენ, ჩვენ კი დავაკვირდებით, რამდენად კარგად მიდის ეს პროცესი“,– განაცხადა ნელი ხიზანიშვილმა.

ლაგოდეხის გამშვები პუნქტი სოფელ მაწიმშია განთავსებული და საქართველო-აზერბაიჯანის საზღვარს აკონტროლებს. ბოლო მონაცემებით, ახალი ტიპის კორნავირუსმა ჩინეთში 100-ზე მეტი ადამიანი იმსხვერპლა, 4515 კი დაინფიცირებულია.

ჯანდაცვის ეროვნული კომისიის ინფორმაციით, ბოლო დღე-ღამის განმავლობაში 26 პაციენტი გარდაიცვალა.

ექიმების ვარაუდით, ვირუსი კიდევ 6973 ადამიანს აქვს, 60 პაციენტი საავადამყოფოებიდან გაწერეს. მედიკოსების მეთვალყურეობის ქვეშ 44 132 ადამიანი რჩება, რომლებსაც დაავადებულებთან კონტაქტი ჰქონდათ.

ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით. ვირუსი ჩინეთის გარდა, უკვე დაფიქსირდა ტაილანდში, აშშ-ში, სინგაპურში, ჰონგ-კონგში, ნეპალში, ავსტრალიაში, ტაივანზე, მალაიზიაში, იაპონიაში, საფრანგეთში, სამხრეთ კორეაში, ვიეტნამსა და კანადაში.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთის ხელისუფლებამ პეკინში ახალი წლისადმი მიძღვნილი ღონისძიებები გააუქმა.

ჩინეთში საქართველოს საელჩოში კი ცხელი ხაზი მოქმედებს. დაავადებათა კონტროლის ეროვნულ ცენტრში განმარტავენ, რომ საქართველოში ვირუსის გავრცელების შანსი მინიმალურია.