პანკისელებს შს მინისტრი გიორგი გახარია შეხვდა

შს მინისტრისა და პანკისის ხეობის მოსახლეობის წარმომადგენლებს შორის მოლაპარაკებები უშედეგოდ დასრულდა.

შეხვედრა კახეთის პოლიციის მთავარ სამმართველოში შედგა. შეხვედრის მონაწილეები ამბობენ, რომ მათ გიორგი გახარიამ უთხრა, რომ თუ კი შეტაკებების დროს, რომელიმე პოლიციელი დაშავდებოდა, დამნაშავეები უმკაცრესად დაისჯებოდნენ.

შეხვედრა პანკისის მოსახლეობის წარმომადგენლებმა პროტესტის ნიშნად დატოვეს. ისინი ამბობდნენ, რომ შეხვედრაზე განხილვის თემა ჰესის მშენებლობა უნდა ყოფილიყო, თუმცა გიორგი გახარიასგან მათ მოისმინეს მხოლოდ ის, რომ აქციის მონაწილეები დაისჯებიან.

თავად შს მინისტრმა შენობა უკომენტაროდ დატოვა.

შეგახსენებთ დღეს დილიდან პანკისის ხეობის სოფელ ბირკიანში ჰიდროელექტროსადგურის სამშენებლო სამუშაოები უნდა დაწყებულიყო. დილიდან ადგილზე მობილიზებულია  სპეცრაზმი და პოლიცია.

ხეობაში სამართალდამცავებსა და ადგილობრივებს შორის დაპირისპირება მას შემდეგ დაიწყო, რაც ადგილზე სპეცდანიშნულების რაზმის დამატებითი ძალები შეიყვანეს. პოლიციამ აქციის მონაწილეების წინააღმდეგ რეზინის ტყვიები და ცრემლსადენი გაზი გამოიყენა. სამართალდამცავების მისამართით ადგილობრივები ქვებს ისროდნენ.

დაპირისპირების შედეგად დაშავებულები არიან როგორც სამართალდამცავები ასევე ადგილობრივები.

 

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *