საქართველოს ახალი კონსტიტუცია ძალაში შევიდა
2017 წელს განხორციელებული კონსტიტუციური რეფორმით, რომელიც პრეზიდენტის მიერ ფიცის დადებისთანავე ძალაში შევიდა, ახალი კონსტიტუციური მოდელი უხვად არის გაჯერებული საპარლამენტო რესპუბლიკის ნიშან-თვისებებით, თუმცა ამ მოდელს კლასიკური საპარლამენტო მოდელებისგან საყოველთაო, პირდაპირი წესით არჩეული სახელმწიფოს მეთაური განასხვავებს. მომდევნო პრეზიდენტის არჩევა კი სწორედ არაპირდაპირი წესით მოხდება.
ახალი რედაქციის კონსტიტუციის ერთ-ერთი საკვანძო სიახლე არის ის, რომ მომდევნო საპრეზიდენტო არჩევნებისთვის პრეზიდენტის პირდაპირი გზით არჩევის წესი აღარ იარსებებს და სახელმწიფოს მეთაურს ამომრჩევლის ნაცვლად, 5 წლის ვადით, დებატების გარეშე, ღია კენჭისყრით საარჩევნო კოლეგია აირჩევს.
,,გადავდივართ საპარლამენტო რესპუბლიკაზე, საპარლამენტო დემოკრატიაზე, რომელიც კიდევ ერთი წინგადადგმული ნაბიჯია იმისთვის, რომ ჩვენ დავუბრუნდეთ ევროპულ ოჯახს და ევროპულ ფასეულობებს, – ამის შესახებ პრემიერ-მინისტრმა მამუკა ბახტაძემ თელავში სალომე ზურაბიშვილის ინაუგურაციის დაწყებამდე განაცხადა.
ახალი კონსტიტუციით, საქართველოს პრეზიდენტად შეიძლება აირჩეს საარჩევნო უფლების მქონე საქართველოს მოქალაქე 40 წლის ასაკიდან, რომელსაც საქართველოში უცხოვრია 15 წელს მაინც. კონსტიტუციით დადგინდა, რომ საქართველოს პრეზიდენტი არ შეიძლება იყოს პოლიტიკური პარტიის წევრი.
იმის გათვალისწინებით, რომ 2018 წლის საპრეზიდენტო არჩევნებში პრეზიდენტის არჩევა 6 წლის ვადით მოხდა, არაპირდაპირი საპრეზიდენტო არჩევნები საქართველოში 2024 წელს ჩატარდება.