მოდი ვნახოთ ვენახი – მევენახეობა პარტიების პროგრამებში
„ქართული ოცნება–დემოკრატიული საქართველოს“ თელავიჶყვარლის მაჟორიტარი დეპუტატი ირაკლი სესიაშვილი თელავში ღვინის მუზეუმის გახსნის ინიციატივით გამოდის, რაც მისი შეფასებით, ამ დარგის პოპულარიზაციას გაზრდის. სესიაშვილი ვენახების უწყებრივი კადასტრის პროგრამის განხორციელების მნიშვნელობაზეც საუბრობს და მიიჩნევს, რომ ეს პროექტი მევენახეობა–მეღვინეობის განვითარებას კიდევ უფრო შეუწყობს ხელს.
„საქართველოში ანალოგიური სისტემა აქამდე არ არსებობდა. საკადასტრო ბაზის არსებობა აუცილებელია ვენახების აღრიცხვიანობის მოწესრიგებისათვის, მევენახეობა-მეღვინეობის დარგში გადაწყვეტილებების მისაღებად, რთველის პროცესის სწორად დაგეგმისთვის, ღვინის წარმოებისა და მისი მოძრაობის კონტროლირებისათვის, ზოგადად – მევენახეობა–მეღვინეობის სფეროს რეგულირებისათვის. ვენახების კადასტრი მოიცავს ვენახების ფართობების რეესტრებს, ინფორმაციას ვენახებში გაშენებული ვაზის ჯიშობრივი შემადგენლობისა და მდგომარეობის შესახებ“, – აცხადებს ირაკლი სესიაშვილი.
„ერთიანი ნაციონალური მოძრაობა“ აქტიურ მუშაობას გეგმავს, რათა გლეხს ყურძნის ჩაბარება არ დასჭირდეს და თავად აწარმოოს ღვინო. თელავი–ყვარლის მაჟორიტარი დეპუტატობის კანდიდატი გიორგი ბოტკოველი ფერმერს გასაღების ბაზრის მოძიებაშიც დახმარებას ჰპირდება.
„სოფლის მეურნეობის მიმართულებით მთავარ პრიორიტეტად დარჩება მეღვიანეობა–მევენახეობა. მე აქტიურად ვიმუშავებ ფერმერებთან, დაინტერესებულ პირებთან, რათა გავუწიო ლობირება მთავრობასთან, ყველა იმ საერთაშორისო ორგანიზაციასთან, რომელმაც ხელი უნდა შეუწყოს ამ უძველესი კულტურის განვითარებას თელავსა და ყვარელში. ჩვენ აუცილებლად ვიმუშავებთ დამატებითი ბაზრის მოძიებაზე და ყველაფერი უნდა გავაკეთოთ, რათა სუბსიდია აღარ იყოს საჭირო“, – აღნიშნავს ბოტკოველი.
მოძრაობის „სახელმწიფო ხალხისათვის“ მაჟორიტარი დეპუტატობის კანდიდატი ვანო გალახვარიძე მევენახეობა–მეღვინეობის განვითარებისათვის სამი აუცილებელი ღონისძიების განხორციელებას ასახელებს. გალახვარიძე მიიჩნევს, რომ სუბსიდია უნდა გაუქმდეს და ხელისუფლებამ ეს თანხა სხვა მიმართულებებზე უნდა გადაანაწილოს.
„მევენახეობა–მეღვინეობის დარგში სახელმწიფომ უნდა შეწყვიტოს სუბსიდირება. ამ თანხით აუცილებლად რამდენიმე მნიშვნელოვანი ღონისძიება უნდა გატარდეს. შხამ–ქიმიკატების ხარისხზე მაქსიმალური კონტროლი უნდა დაწესდეს. ადრე თუ დაახლოებით 6–ჯერ იწამლებოდა ვენახი, წელს გლეხებმა 15–ჯერ მოწამლეს. ეს უხარისხო შხა–ქიმიკატების ბრალია. ასევე პრობლემაა ის, რომ შხამ–ქიმიკატების შემოტანაზე რამდენიმე კომპანიას აქვს მონოპოლია. ამ მხრივ უნდა შეიქმნას ანტიმონოპოლიური სამსახური, რომელიც ამ პროცესს გააკონტროლებს. შედეგად მათი ღირებულება შემცირდება, რადგან ბევრი კომპანია დაიწყებს შხამ–ქიმიკატების გაყიდვას. სუბსიდირების გაუქმების შედეგად გათავისუფლებული თანხის ნაწილით სახელმწიფომ უნდა შემოიყვანოს ტექნიკა, რომელიც შესაბამის სამუშაოებს შეასრულებს. ეს ორი ღონისძიება ყურძნის მოყვანის თვითღირებულებას დაახლოებით ორჯერ შეამცირებს. გარდა ამისა, ფერმერს უნდა ჰქონდეს მაქსიმალური შესაძლებლობა, გაეცნოს უცხო ქვეყანაში საოჯახო მეურნეობების მიერ ღვინის წარმოების პროცესს. ეს ხელს შეუწყობს საოჯახო ბრენდების ჩამოყალიბებას. აუცილებელია, ჩატარდეს ღვინის ფესტივალები, სადაც ძირითადად მონაწილეობას მიიღებენ მცირე მეწარმეები, უცხოელი ინვესტორები და ბიზნესმენები, რომლებიც გაიცნობენ გლეხების მიერ წარმოებულ ღვინოს“, – ამბობს გალახვარიძე.
„ეროვნულ ფორუმში“ კი მევენეხეობა–მეღვინეობის განვითარების ერთჶერთ მთავარ წინაპირობად ბიზნესის პოლიტიკისგან გამიჯვნას მიიჩნევენ. პარტიის მაჟორიტარ–დეპუტატობის კანდიდატი გელა გელაშვილი ფიქრობს, რომ სახელმწიფომ უნდა განახორციელოს ეფექტური ღონისძიებები და აწარმოოს სწორი ეკონომიკური პოლიტიკა, რათა ქართული ღვინო ნებისმიერი ქვეყნის ბაზარზე გაიყიდოს. მისი აზრით, ასევე, აუცილებელია რამდენიმე სახელმწიფო საწარმო გაიხსნას, რის შედეგადაც დარეგულირდება ყურძნის ჩასაბარებელ ფასი და ამ მხრივ მევენახეს ალტრნატივაც გაუჩნდება
„სახელმწიფომ უნდა აიღოს პასუხისმგებლობა და გახსნას რამდენიმე მძლავრი ქარხანა. ეს გაუჩენს გლეხს იმის ალტერნატივას, რომ პროდუქცია წაიღოს სხვაგან. ეს დაარეგულირებს ფასს და გლეხისთვის იქნება ერთგვარი სტიმული. ყურძნის ჩასაბარებელი ფასი შედარებით მაღალი იქნება. გარდა ამისა, ბიზნესი უნდა გაიმიჯნოს პოლიტიკისგან. პოლიტიკურად საფრანგეთსა და იტალიას დაძაბული ურთიერთობა აქვთ რუსეთთან, მაგრამ ეს ქვეყანა არის მათი პროდუქციის გასაღების ძირითადი ბაზარი. ამ კუთხით აქტიურად უნდა ვიმუშავოთ. არ ვამბობ, რომ ეს იქნება ადვილი, მაგრამ მსოფლიოს სხვადასხვა ქვეყანაში ქართული ღვინის რეალიზაციისათვის ყველაფერი უნდა გავაკეთოთ“, – ამბობს გელაშვილი.
წლევანდელ რთველს მევენახეები კვლავ უარყოფითად აფასებენ და ყურძნის ჩასაბარებელი ფასით ისევ უკმაყოფილებას გამოთქვამენ. ისინი მიუთითებენ, რომ ყურძენს იძულებით აბარებენ, რადგან ღვინის რეალიზაცია უჭირთ. მცირე მეწარმეები სახელმწიფოს ღვინის წარმოებასა და ბაზრის მოძიებაში დახმარებას სთხოვენ. ექსპერტებს კი მიაჩნიათ, რომ საექსპორტო პოტენციალის გაუმჯობესება, ქართული ღვინოების დამკვიდრება მსოფლიო ბაზარზე უნდა იქცეს მევენახეობა–მეღვინეობის განვითარების სტრატეგიულ მიმართულებად, რაც მნიშვნელოვან როლს შეასრულებს ქვეყნის ეკონომიკურ ზრდაში.
სტატია მომზადებულია პროექტის ადგილობრივი მედია ინფორმირებული ახალგაზრდა ამომრჩეველისათვის. ფარგლებში, რომელიც ხორციელდება „მედია ცენტრი კახეთის“ მიერ.
