კახეთში „საქართველოს ფოლკლორის ეროვნული ფესტივალი“ დაიწყება

ფესტივალი მოიცავს ქართული ტრადიციული ხელოვნების შემდეგ დარგებს: ხალხური სიმღერა, ტრადიციული საეკლესიო გალობა, ტრადიციული ინსტრუმენტული შემსრულებლობა, ქორეოგრაფია, ზეპირსიტყვიერი ფოლკლორი, სახვითი და გამოყენებითი ხელოვნება. 
ფოლკლორის ფესტივალი ორი ტურისაგან შედგება. რეგიონული ტური 2015 წლის განმავლობაში ჩატარდება, ხოლო დასკვნითი ტური კი 2016 წელს გაიმართება. 
ფესტივალის გამარჯვებულებს გამოავლენს საგანგებოდ შექმნილი დარგობრივი კომისია ფინალისტებს გადაეცემათ I, II და III ხარისხის ფულადი პრემია. ცალკე ნომინაცია დაწესდება მუსიკასა და ქორეოგრაფიაში – უძველესი ნიმუშების აღდგენა-დამუშავება და შესრულება (ქართული ხალხური სიმღერა, ცეკვა, საკლესიო გალობა), სახვითი და გამოყენებითი ხელოვნების დარგში – საკრავებისა და ეროვნული სამოსის აღდგენა და შექმნა.
კულტურის სამინისტროში აცხადებენ, რომ ფოლკლორის ეროვნულ ფესტივალში მონაწილეობის საშუალება ექნებათ საქართველოში მცხოვრებ ყველა ეთნიკური უმცირესობის ფოლკლორულ ჯგუფს, ინდივიდუალურ შემსრულებელს, სახვითი და გამოყენებითი ხელოვნების დარგის წარმომადგენელს. ფესტივალის ყველა გამარჯვებულს, ფულად პრემიებთან და სახელობით პრიზებთან ერთად გადაეცემათ ლაურეატის დიპლომი.
2016 წლისთვის საქართველოს ფოლკლორის ეროვნული ფესტივალის შესახებ გამოიცემა წიგნი, ხოლო ფესტივალის ლაურეატთა დაჯილდოების საზეიმო ცერემონიალის ამსახველი ვიდეო მასალა კი – DVD დისკის სახით.