სკოლის ატესტატის გარეშე 1500-ზე მეტი მეთორმეტეკლასელი დარჩა

ე.წ. გამსვლელი ქულა, რომლის მიღების შემთხვევაშიც ბარიერი დაძლეულად ითვლებოდა- 5.5-ია. მინიმალური კომპეტენციის ზღვარი ქართულ ენასა და ლიტერატურაში მოსწავლეთა 2.19%-მა ვერ გადალახა, ინგლისურში – მოსწავლეთა 3.83%-მა, ისტორიაში – 3.89%-მა, რუსულში – 11.85%-მა, გერმანულში – 6.53%-მა, ფრანგულში – 7.9%-მა, გეოგრაფიაში – 1.37%-მა და ფიზიკაში – 3.03%-მა. გამოსაშვები გამოცდების შესახებ Aris.ge-განათლება შეფასებისა და გამოცდების ეროვნული ცენტრის ხელმძღვანელის მოადგილეს ივა მინდაძეს ესაუბრა.

“უშეცდომო არაფერია, თუმცა ხმები, თითქოს ძალიან ბევრი პრობლემა და ხარვეზი იყო – გადაჭარბებულია. ეს ინფორმაცია, რომ სინამდვილეს შეესაბამებოდეს, ალბათ, უფრო დიდი რეზონანსი მოჰყვებოდა. მოსწავლეებს ტესტები გამოცდიდან ზეპირად, მეხსიერებით გამოაქვთ, შესაძლოა კარგად აღარც ახსოვდეთ,”– განუცხადა ,,კომერსანტს” ივა მინდაძემ. 

სკოლებში გამოცდების ციებ–ცხელება ჯერ არ დასრულებულა. ერთიან ეროვნულ გამოცდებამდე “CAT”–ის გამოცდას მეთერთმეტე კლასელებიც გაივლიან. ფიზიკა, ქიმია, გეოგრაფია და ბიოლოგია – ეს ის ოთხი საგანია, რომელთა სწავლებაც მეთერთმეტე კლასში სრულდება და ამ საგნებში მოსწავლის საბაზო ცოდნა გამოცდით შემოწმდება.