პოლონეთის საელჩო მოქალაქეებს საქართველოში არშეშვების რისკების შესახებ აფრთხილებს
პოლონეთის საელჩო მოქალაქეებს საქართველოში შესვლაზე უარის თქმის რისკების შესახებ აფრთხილებს. შესაბამის განცხადებას საქართველოში პოლონეთის საელჩო ავრცელებს.
გავრცელებულ განცხადებაში დასახელებულია არშეშვების შესაძლო მიზეზები, მათ შორის დემონსტრაციებში მონაწილეობა, ასევე სოციალურ ქსელში აქტივობა.
“საქართველოში შესვლაზე უცხოელებისთვის, მათ შორის ევროკავშირის წევრი ქვეყნების მოქალაქეებისთვის უარის თქმის მრავალი შემთხვევის გამო, გთხოვთ, საქართველოში გამგზავრებამდე გაითვალისწინოთ, არსებობს თუ არა თქვენს კონკრეტულ შემთხვევაში ფაქტორები, რომლებიც ზრდის შესვლაზე უარის თქმის რისკს: ეს შეიძლება მოიცავდეს დემონსტრაციებში მონაწილეობას ან მათ სიახლოვეს ყოფნას, ასევე სოციალურ ქსელებში გარკვეულ აქტივობას.
შეგახსენებთ, რომ საქართველოს ხელისუფლებას აქვს სუვერენული უფლება შეაფასოს უცხოელის შესვლის რისკ-ფაქტორები და ასევე, შესვლაზე უარის თქმის გადაწყვეტილება შეიძლება საქართველოში ბინადრობის ნებართვის მფლობელებზეც გავრცელდეს.
ასევე, გვსურს აღვნიშნოთ, რომ დემონსტრაციებში მონაწილეობისთვის, თუნდაც სავარაუდო მონაწილეობისთვის, უცხოელებს შეიძლება მძიმე ჯარიმები დაუწესდეთ, ხოლო საქართველოში ხელახლა შესვლისთვის შეიძლება მათი დაუყოვნებლივ გადახდა გახდეს აუცილებელი“, – ნათქვამია განცხადებაში.