ნინო დოლიძე – სოციალურ მედიაში მოქმედმა ქსელმა, რომელიც რუსეთთანაა დაკავშირებული, ხელისუფლების მხარდამჭერი კამპანია გაააქტიურა

წინასაარჩევნო პერიოდში რუსული საინფორმაციო ოპერაციები პოლიტიკურ პროცესებში მნიშვნელოვნად გააქტიურდა – სოციალურ მედიაში მოქმედმა ქსელმა, რომელიც რუსეთთან არის დაკავშირებული, ხელისუფლების მხარდამჭერი კამპანია გაააქტიურა – ამავე პერიოდში მმართველი პარტიის მხრიდან ანტიდასავლური, მათ შორის, ევროსკეპტიკური გზავნილები იყო აქტუალური,- ამის შესახებ ISFED-ის ხელმძღვანელმა, ნინო დოლიძემ საქართველოს პარლამენტის 2024 წლის არჩევნების წინასაარჩევნო გარემოს შეფასებისას განაცხადა.

ბრიფინგზე საუბრისას დოლიძემ საპარლამენტო არჩევნებისთვის მედიაგარემო პოლარიზებულად შეაფასა.

ამასთან, როგორც დოლიძემ განმარტა, „წინასაარჩევნო გარემო ამომრჩეველთა პერსონალური მონაცემების შეგროვების/დამუშავებისა და მოქალაქეთა პირადობის დამადასტურებელი მოწმობების სავარაუდო შეგროვების ფაქტებმა დააზიანა”.

„მოახლოებულ არჩევნებს ქვეყნის მომავლისთვის გადამწყვეტად მიიჩნევენ ძირითადი პოლიტიკური გაერთიანებები. მათი მნიშვნელოვანი ნაწილი 26 ოქტომბრის არჩევნებს რეფერენდუმადაც სახავს – მმართველი პარტია – „ქართული ოცნება – დემოკრატიული საქართველო”არჩევნებს ომსა და მშვიდობას შორის გასაკეთებელ არჩევანად მიიჩნევს, ძირითადი ოპოზიციური პარტიები კი მას ქვეყნის დემოკრატიულ, ევროპულ მომავალსა და საერთაშორისო იზოლაციას ან/და რუსეთის გავლენის ქვეშ მოქცევას შორის არჩევანს უტოლებენ.

არჩევნებში მონაწილეობის მიზნით ცენტრალურ საარჩევნო კომისიაში რეგისტრაცია გაიარა და საარჩევნო სია წარადგინა 18-მა პოლიტიკურმა გაერთიანებამ. ყველა პარტიას მეტ-ნაკლებად შეეძლო ეწარმოებინა წინასაარჩევნო კამპანია. წინასაარჩევნო ღონისძიებების დაწყებისთანავე მმართველი პარტიის ლიდერები საკუთარ ამომრჩეველს, საკონსტიტუციო უმრავლესობის მიღების შემთხვევაში, ძირითადი ოპოზიციური გაერთიანებების ანტიკონსტიტუციურად გამოცხადებას დაჰპირდნენ”,- აღნიშნა დოლიძემ.

მისივე თქმით, მმართველი პარტია ადმინისტრაციული რესურსების გამო „მნიშვნელოვანი უპირატესობით სარგებლობდა“.

„წინასაარჩევნო კამპანიის განმავლობაში მმართველი პარტია მნიშვნელოვანი უპირატესობით სარგებლობდა მის მხარეს არსებული ადმინისტრაციული რესურსების გამო. ადგილი ჰქონდა საარჩევნოდ მოტივირებული არაერთი სოციალური, ეკონომიკური თუ ინფრასტრუქტურული პროგრამისა და პროექტის ინიციირებას და საბიუჯეტო ორგანიზაციების თანამშრომელთა მმართველი პარტიის სააგიტაციო ღონისძიებებში აქტიურ მონაწილეობას. წინასაარჩევნო გარემო დააზიანა ამომრჩეველთა პერსონალური მონაცემების შეგროვების/დამუშავებისა და მოქალაქეთა პირადობის დამადასტურებელი მოწმობების სავარაუდო შეგროვების ფაქტებმა, რაც წარმოადგენს ამომრჩეველზე ზეწოლისა და ამომრჩევლის ნების გამოხატვისთვის ხელისშეშლის მცდელობას. ასევე, შესაბამისი სახელმწიფო უწყებების მხრიდან ასეთი შემთხვევების რეაგირების გარეშე დატოვებამ.

არჩევნების წინ, ქვეყნის შიგნით არსებული დეზინფორმაციული და საინფორმაციო მანიპულაციების პარალელურად, მნიშვნელოვნად გააქტიურდა რუსული საინფორმაციო ოპერაციები პოლიტიკურ პროცესებში. სოციალურ მედიაში მოქმედმა ქსელმა, რომელიც რუსეთთან არის დაკავშირებული და წინა წლებში, ძირითადად, ანტიდასავლურ გზავნილებს, კერძოდ კი, საქართველოს ევროკავშირში ინტეგრაციის საწინააღმდეგო ნარატივებს ავრცელებდა, წინასაარჩევნო პერიოდში ხელისუფლების მხარდამჭერი კამპანია გაააქტიურა”,- განაცხადა ნინო დოლიძემ.