საია- არჩევნების მიმდინარეობას 1500-ზე მეტ უბანზე დავაკვირდებით

„საქართველოს ახალგაზრდა იურისტთა ასოციაციის“ ინფორმაციით, 26 ოქტომბერს, არჩევნების მიმდინარეობისას, საია 1500-ზე მეტ უბანს დააკვირდება.

როგორც საია-ს დემოკრატიული ინსტიტუტების მხარდაჭერის პროგრამის დირექტორმა ნანუკა ყრუაშვილმა განაცხადა, ორგანიზაცია, ასევე საზღვარგარეთ გახსნილ საარჩევნო უბნებს, 20 დამკვირვებლით დააკვირდება.

მისივე თქმით, დამკვირვებლები მაქსიმალურად არიან გადამზადებულები და საარჩევნო უბანზე ყველა შესაძლო სცენარისთვის მზად არიან.

„ჩვენ არჩევნებზე 650-მდე დამკვირვებელი გვყავს და 1500-ზე მეტ საარჩევნო უბანს დავაკვირდებით, რაც საქართველოში გახსნილი საარჩევნო უბნების ნახევარს შეადგენს. ჩვენ ასევე გვეყოლება მობილური და სტატიკური დამკვირვებლები, დავფარავთ მთლიან საქართველოს და ვცდილობთ დავფაროთ ეროვნული უმცირესობების რეგიონები. ჩვენ არჩევნებს ვაკვირდებით საზღვარგარეთაც, სადაც 20 დამკვირვებელი გვეყოლება.

ჩვენი დამკვირვებლები მაქსიმალურად დატრენინგებულები არიან, მათ კარგად იციან საარჩევნო სამართალი და ინფორმირებულები არიან ყველა დარღვევასთან დაკავშირებით, რომელიც შეიძლება უბანზე დაფიქსირდეს”,- განაცხადა ნანუკა ყრუაშვილმა.