კვლევა-საქართველოში ყოველი მეოთხე ადამიანი განათლებისა და დასაქმების მიღმაა დარჩენილი

აისეტის ერთ-ერთი ბოლო კვლევის თანახმად, საქართველოში ყოველი მეოთხე ადამიანი განათლებისა და დასაქმების მიღმაა დარჩენილი. რა კეთდება ქვეყანაში ამ პრობლემის გამოსასწორებლად, „ბიზნესპრესნიუსთან“ ამ თემაზე საქართველოს პედაგოგთა და მეცნიერთა პროფკავშირების პრეზიდენტმა, მაია კობახიძემ ისაუბრა.

„საბჭოთა კავშირის დანგრევის მერე, საქართველოში, ისევე, როგორც ბევრ პოსტსაბჭოთა ქვეყანაში მომხდარი რადიკალური სოციალური ტრანსფორმაციის პირობებში მნიშვნელოვან გამოწვევად დარჩა განათლებისა და დასაქმების მიღმა დარჩენილი ადამიანების საკითხი.

მხოლოდ თანდათან და ნელ-ნელა დაიწყო მათი გაუმჯობესება და განვითარება, მაგრამ დღესაც ძალიან ბევრი პრობლემაა. ძირითადად თვითდასაქმების სფერო არის ხელმისაწვდომი, რომელიც დაბალუნარიან შრომას და დაბალ შემოსავალს უკავშირდება“, – აღნიშნა კობახიძემ.

როგორც მან განაცხადა, სასიკეთო ცვლილება იყო 2021 წელს სპეციალური უნარების განვითარების სააგენტოს შექმნა, რომელმაც სიტუაცია შედარებით დაასტაბილურა.

„ბოლო წლებში გატარებული ღონისძიებებიდან, ჩვენთვის, პროფკავშირისთვის მნიშვნელოვანი იყო პროფესიული განათლების მხარდაჭერის პოლიტიკა, რადგან დასაქმება პირდაპირ კავშირშია პროფესიულ განათლებასთან. 2013 წელს მიღებულ იქნა პროფესიული განათლების სტრატეგია, ეს იყო ევროკავშირის და ცალკეული ევროპული ქვეყნების მხარდაჭერით და საკმაოდ წარმატებები აჩვენა ამ მიმართულებებით. ყველაზე კარგი კი რაც ამ ყველაფერმა მოიტანა იყო ის, რომ 2021 წელს ჩამოყალიბდა სპეციალური უნარების განვითარების სააგენტო, ესეც გაეროს განვითარების დახმარებით. ეს იყო პროფესიული განათლების მართვის ახალი მოდელი, სადაც დამკვეთი არის კერძო სექტორი, შრომის ბაზარზე მოთხოვნადი პროფესიული პროგრამების დანერგვის ხელშეწყობისა და უკეთესი განათლების უზრუნველსაყოფად.

ამის მერე, სახელმწიფო უმაღესმა სასწავლებლებმა თავად გახსნეს პროფესიული კოლეჯები, სადაც კვალიფიციური მასწავლებლები მუშაობენ და ისინი აღჭურვილნი არიან საჭირო საგანმანათლებლო რესურსით. თუმცა, ეს კოლეჯები უფრო საჭიროა რეგიონის უნივსერსიტეტების ნხარდაჭერისათვის და მნიშვნელოვანია ასევე წვდომა, რომ ასაკის მიუხედავად არ იყოს შეზღუდვა“ – აღნიშნა მაია კობახიძემ.

მისი თქმით, შედარებით უკეთესი მდგომარეობაა უწყვეტი განათლების სისტემის კუთხითაც.

„2017 წელს განათლების სამინისტრომ პროფესიული განათლების პროგრამა შეიტანა საჯარო სკოლებში და სწორედ საჯარო სკოლებისა და პროფესიული კოლეჯების თანამშრომლობის მასშტაბური პირველი პრეცენდენტი იყო და ამან მოსწავლეებსაც მისცა შესაძლებლობა, სკოლის პროგრამის პარალელურად დაეუფლოს პროფესიულ სწავლებას. ის, თუ რა შედეგს გამოიღებს ეს ყველაფერი, მალე გამოჩნდება. მთავარი არის ის, რომ შრომის ბაზარზე რომელი კადრების საჭიროებაც არის, იმ კადრების მომზადება მოხდეს ახალგაზრდებში, რომ შემდეგ უკვე კერძო სექტორის დახმარებით მათი დასაქმება მოხდეს“ – განაცხადა მაია კობახიძემ.