ლაგოდეხში ნარჩენების ეფექტური მართვისთვის 100 000 ლარი დაიხარჯება

ლაგოდეხის მუნიციპალიტეტის მერიამ, „ევროკავშირისა (EU) და გაეროს განვითარების პროექტის (UNDP), სოფლის განვითარების სააგენტოს საგრანტო პროგრამის ფარგლებში, 100 000 ლარის ოდენობის გრანტი მიიღო.

პროექტის მიზანს, მუნიციპალიტეტში ნარჩენების მართვის გაუმჯობესება, სწორი და ეფექტური მართვა წარმოადგენს. აღნიშნული გრანტის ფარგლებში, მუნიციპალიტეტი შეიძენს პლასტმასის საწნეხ დანადგარს და მეტალის ბადისებრ კონტეინერებს, რისი მეშვეობითაც ნარჩენების მართვა მეტად ეფექტური გახდება.

„იაპონიის საელჩოს გრანტის ხელშეწყობით, უკვე შევიძინეთ ნაგავმზიდი ავტომანქანა და გავზარდეთ ნაგვის ურნების რაოდენობა. გვაქვს სურვილი, ვიყოთ გამორჩეული, სუფთა და საუკეთესო მუნიციპალიტეტი. მუნიციპალიტეტს შემუშავებული აქვს ნარჩენების მართვის 5 წლიანი გეგმა, შესაძლებლობის ფარგლებში, ვცდილობთ, დავუახლოვდეთ ნარჩენების მართვის მსოფლიო სტანდარტებს. ნარჩენების სეპარირების დანერგვა, ხელს შეუწყობს გარემოს დაბინძურების შემცირებას“ – აცხადებს ჯონდო მდივნიშვილი.

შეგახსენებთ, ლაგოდეხის მუნიციპალიტეტი „საუკეთესო პრაქტიკათა ეროვნული კონფერენციის“ ფარგლებში, დაჯილდოვდა საუკეთესო პრაქტიკის მქონე მუნიციპალიტეტის სტატუსით. ასევე, მუნიციპალიტეტი დაჯილდოებულია, „სუფთა რეგიონის“ და „სუფთა ქალაქის“ ნომინაციით.