კახეთისთვის „სუფთა რეგიონის“ სტატუსის მინიჭება ღონისძიებით აღინიშნა- ფოტოები

პროექტის „დავიცვათ საქართველოს სისუფთავე“ ფარგლებში, კონკურსის „სუფთა რეგიონი“ დაჯილდოების ღონისძიება გაიმართა.

„სუფთა რეგიონის” კონკურსზე, ზედიზედ მეოთხედ კახეთს „სუფთა რეგიონი“-ს სტატუსი მიენიჭა. ამავე კონკურსის ფარგლებში, ნომინაციაში „სუფთა ქალაქი“ ლაგოდეხის მუნიციპალიტეტმა, ხოლო ნომინაციაში, „სუფთა ქუჩა“ ახმეტის მუნიციპალიტეტმა გაიმარჯვა.

აღნიშნულ საკითხთან დაკავშირებით, დღეს, ქალაქ თელავში, კახეთის სახელმწიფო რწმუნებულის ადმინისტრაციის ორგანიზებითა და დანიშნულების ადგილის მართვის ორგანიზაციის (DMO) „ვიზიტ კახეთი“ მხარდაჭერით „სუფთა რეგიონის“ აღნიშვნის ღონისძიება მასშტაბურად ჩატარდა.

გუბერნატორმა ირაკლი შიოშვილმა და კახეთის მუნიციპალიტეტების მერებმა მოწვეულ რეგიონის რვავე მუნიციპალიტეტის დასუფთავებისა და კეთილმოწყობის სამსახურების წარმომადგენლებს „სუფთა რეგიონის“ სტატუსი პირადად მიულოცეს, წარმომადგენლებს მადლობის სიგელები, ხოლო მეეზოვე ქალბატონებს თაიგულები გადასცეს.

„სუფთა რეგიონის“ დაჯილდოების ღონისძიებაზე მე პირობა დავდე, რომ ამ ჯილდოს თქვენთან ერთად გავიზიარებდი, რადგან თითოეული თქვენგანის დამსახურებაა კახეთისთვის ამ სტატუსის მინიჭება ზედიზედ მეოთხედ. ეს ჯილდო ეკუთვნის თითოეულ იმ ადამიანს, რომელიც გულმოდგინედ ასრულებს სამსახურებრივ მოვალეობას და ზრუნავს ჩვენს რეგიონში ჯანსაღი, სუფთა გარემოს შექმნაზე.
მოდის ტურისტული სეზონი და კახეთი მოწოდების სიმაღლეზე დახვდება რეგიონში ჩამოსულ ვიზიტორებს. სუფთა რეგიონის სტატუსი კი ჩვენთვის დიდი მოტივაციაა, რომ რეგიონი ყოველწლიურად კიდევ უფრო სუფთა და მიმზიდველი გავხადოთ. მადლობას ვუხდი თითოეულ მეეზოვეს, რომელიც ჩვენი რეგიონის სისუფთავის შენარჩუნებისთვის ერთგულად ასრულებს თავის საქმეს “– აღნიშნა ირაკლი შიოშვილმა.