ფოტო გამოფენა „იაპონიის საკურა 2022“ სიღნაღში გაიმართება
18 მაისიდან 30 ივნისის ჩათვლით, სიღნაღში, ფოტო გამოფენა „იაპონიის საკურა 2022“ გაიმართება. ამის შესახებ ინფორმაციას საქართველოში იაპონიის საელჩო ავრცელებს.
მათივე ცნობით, ღონისძიება იაპონიასა და საქართველოს შორის დიპლომატიური ურთიერთობების დამყარების 30 წლის იუბელეს აღსანიშნავად გაიმართება.
„მოხარულები ვართ გაცნობოთ, რომ 2022 წელს ჩვენ აღვნიშნავთ იაპონიასა და საქართველოს შორის დიპლომატიური ურთიერთობების დამყარების 30 წლის იუბელეს. ამ საიუბილეო თარიღთან დაკავშირებით, ჩვენი საელჩო სხვადასხვა ღონისძიებები ჩატარებას გეგმავს მთელი წლის განმავლობაში. უკვე ჩატარდა რამოდენიმე კულტურული ღონისძიება, რომელთა შესახებ ინფორმაცია შეგიძლიათ იხილოთ ჩვენი საელჩოს ვებ-გვერდსა და ფეისბუქ გვერდზე.
შემდეგი ღონისძიება, ფოტო-გამოფენა „იაპონიის საკურა 2022“ გაიმართება სიღნაღის ეროვნულ მუზეუმში 18 მაისიდან 30 ივნისის ჩათვლით. გამოფენაზე წარმოდგენილი იქნება იაპონიის საელჩოს პირველი მდივნის, ბატონი იმანიში ტაკაოს მიერ გადაღებული საკურას ფოტოები იაპონიაში. წელს, მარტის ბოლოდან აპრილის დასაწყისში იაპონიაში საკურას უამრავი, ულამაზესი ყვავილი გაიშალა. ზუსტად ამ დროს ბატონი იმანიში ტაკაო იაპონიაში იმყოფებოდა ხანმოკლე ვადით, და გადაიღო ფოტოები სხვადასხვა ადგილას რათა ქართველებისთვის გაეცნო იაპონიის ეს ულამაზესი პერიოდი.
იაპონიის სიმბოლო, საკურა გაზაფხულზე მხოლოდ ორი კვირა ყვავის; აყვავდება და თვალის დახამხამებაში ქრება. ამ ყველაფერში კი ამ სამყაროს წარმავალობას განასახიერებს. თუმცა გაზაფხულზე, საკურას ყვავილობის ზენიტში, იაპონიის არქიპელაგი თვალწარმტაცია. იაპონელები ტკბებიან საკურას ცქერით; ოჯახის წევრებთან და მეგობრებთან ერთად ატარებენ დროს აყვავებული საკურას ხეებქვეშ და სამახსოვროდ ფოტოებს იღებენ“, – ნათქვამია საელჩოს მიერ გავრცელებულ ინფორმაციაში.