პრეზიდენტი თელავში სალომე ზურაბიშვილის ინაუგურაციას დაესწრება

ეს პირველი შემთხვევაა, როდესაც საქართველოს მოქმედი პრეზიდენტი ქვეყნის ახლადარჩეული მეთაურის ინაუგურაციას დაესწრება.

საქართველოს მეხუთე პრეზიდენტი ფიცს ერეკლე მეფის სასახლის ეზოში დადებს. ინაუგურაცია 15 საათზე დაიწყება და 40 წუთის განმავლობაში გაგრძელდება. მოწვეული სტუმრების საზეიმო მიღება წინანდალში, სასტუმრო რედისონშია დაგეგმილი.

“პრეზიდენტის ინაუგურაციისთვის სცენის მოწყობა უკვე დასრულებულია. ფიცის დადების ცერემონია გაიმართება ერეკლე მეფის სასახლის აღმოსავლეთი ნაწილში. ინაუგურაციაში მონაწილეობას მიიღებს ჯარი. ცერემონიის გენერალური რეპეტიცია უნდა გაიმართოს 14 ან 15 დეკემბერს და მოსამზადებელი სამუშაოები მანამდე აუცილებლად დასრულდება. ინაუგურაციაზე 1000-1200 სტუმარს ელოდებიან”, – განუცხადა Knews.ge-ს თელავის ისტორიული მუზეუმის დირექტორმა, გურამ ურჩუხიშვილმა.

ნიკოლოზ ესიტაშვილი