“ყინვა იქნება მარტშიც – ტემპერატურა -12 გრადუსამდე დაეცემა”
გარემოს ეროვნული სააგენტოს ჰიდრომეტეოროლოგიის დეპარტამენტის, ამინდის გრძელვადიანი პროგნოზების განყოფილების უფროსი სპეციალისტის თამარ პაპაშვილის ინფორმაციით, საქართველოს ტერიტორიაზე არქტიკული ცივი ჰაერის მასების გავრცელებამ დიდთოვლობა, ჰაერის ტემპერატურის დაბალი მაჩვენებლები, ზოგან ძლიერი ქარი გამოიწვია.
,,ასეთი ამინდები ქვეყნის მასშტაბით 27 თებერვლის ჩათვლით იქნება შენარჩუნებული. 27 თებერვლის დღის მეორე ნახევრიდან ზოგან გამოიდარებს, 28 თებერვალს უმეტესად უნალექო ამინდი იქნება, ასე გაგრძელდება 1-2 მარტსაც და 3 მარტიდან კვლავ ამინდის გაუარესებაა მოსალოდნელი.
უახლოესი დღეებში, აღმოსავლეთ საქართველოში ნალექი უმეტესად თოვლის სახით არის მოსალოდნელი. ზოგან ძლიერი. ჰაერის ტემპერატურა ღამის საათებში კვლავ უარყოფით ნიშნულზე იქნება მთელი საქართველოს ტერიტორიაზე. 28 თებერვლიდან 3 მარტამდე ღამის ტემპერატურა კიდევ უფრო დაიკლებს. მინუს 6 გრადუსამდე დასავლეთ საქართველოში და მინუს 10-12 გრადუსამდე აღმოსავლეთ საქართველოს ბარში. ძალიან რთული მეტეოროლოგიური პირობებია, სიფრთხილე გვმართებს გზებზე, ლიპყინული, ქარბუქი, დიდთოვლობა და ხილვადობის გაუარესება გზებზე საფრთხეს უქმნის მოძრაობას”.