დღეს წმ. ნინოს ხსენებაა
უწმინდესამა და უნეტრესმა სრულიად საქართველოს კათოლიკოს-პატრიარქმა, ილია II-მ საღმრთო ლიტურგია თბილისის სიონის ტაძარში აღასრულა, ხოლო აბბა ალავერდელმა მიტროპოლიტმა დავითმა ღამისთევის სადღესასწაულო მსახურება თელავის წმ. ნინოს სახელობის ეკლესიაში აღავლინა. დღესვე მეუფე დავითი, 2 საათზე, მოციქულთა სწორის სავედრებელ პარაკლისს ახმეტის მუნიციპალიტეტის სოფელ ქისატუარის წმინდა ნინოს სახელობის ტაძარში, ხოლო 3 საათზე იყალთოს წმინდა ნინოს ახლადაღდგენილ ეკლესიაში ჩაატარებს.
წმიდა ნინო წარმოშობით კაბადოკიის ქალაქ კოლასედან იყო. მისი მამა, ზაბულონი საფრანგეთის განმანათლებლად ითვლება. მოციქულთა სწორი ქალწული ნინო საქართველოში, დაახლოებით, 323 წელს ჯავახეთის მთებით შემოვიდა. მას ღვთისმშობლის მიერ ბოძებული ვაზის ჯვარი ეპყრა ხელში.
წმიდა ნინო ფარავნის ტბასთან ორი დღე შეჩერდა და მეთევზურთაგან მირთმეული საკვებით ძალა მოიკრიბა. დასასვენებლად მიწაზე მიწოლილს ძილში ბრწყინვალე კაცი ეჩვენა, რომელმაც დაბეჭდილი წერილი მისცა და უთხრა, რომ წერილი წარმართთა მეფისთვის მიერთმია, რადგანაც ამისთვის იყო მოვლენილი. წერილის თავში რომაულად იესოს სახელი ეწერა და, როგორც მოსეს ქვის ფიცრებზე, ათი სიტყვა იყო დაწერილი.
ქართველთა განმანათლებლისა და მოციქულთა სწორის, წმიდა ნინოს ქადაგებით, საქართველოში ქრისტიანობა სახელმწიფო რელიგიად 326 წელს გამოცხადდა. ამ დროს სამეფო ტახტი მეფე მირიანსა და დედოფალ ნანას ეპყრათ.
წმიდა ნინოს ხსენებას საქართველოს ეკლესია წელიწადში ორჯერ დღესასწაულობს: 1(19) ივნისს მისი საქართველოში შემოსვლა აღინიშნება, ხოლო 27(14) იანვარს – გარდაცვალება.