როგორია პოლიტიკური პარტიების ხედვა საქართველოს ევროატლანტიკური არჩევანის შესახებ
ყველა წამყვანი პოლიტიკური პარტია, მცირერიცხოვანი პოლიტიკური სუბიექტების გარდა, თანხმდება იმაზე, რომ ნატოსა და ევროკავშირში საქართველოს გაწევრიანებას ალტერნატივა არ გააჩნია, თუმცა მათ ამ მიმართულებით განსხვავებული ხედვა და სტრატეგია აქვთ. აშშ–ის ეროვნულ–დემოკრატიული ინსტიტუტის (NDI) მიერ 27 ივლისს გამოქვეყნებული საზოგადოებრივი აზრის ახალი გამოკვლევის თანახმად, საქართველოს მოქალაქეების უმრავლესობა მტკიცედ უჭერს მხარს ევროკავშირსა (72 %) და ნატოში (64 %) ინტეგრაციას, თუმცა გამოკითხულთა 29 % მაინც მიიჩნევს, რომ უფრო სასარგებლო იქნება ევროპულ და ევროატლანტიკურ ამბიციებზე უარის თქმა „რუსეთთან უკეთესი ურთიერთობების“ სანაცვლოდ. სახელისუფლო პარტია „ქართული ოცნება–დემოკრატიული საქართველოსთვის“ კი ნატოსა და ევროკავშირში საქართველოს გაწევრიანება მთავარ პრიორიტეტად რჩება. პარტიის ერთ–ერთი ლიდერი და თელავი–ყვარლის მაჟორიტარი დეპუტატობის კანდიდატი ირაკლი სესიაშვილი მიიჩნევს, რომ ქვეყნის სუვერენიტეტისა და უსაფრთხოების განმტკიცებისათვის ევროატლანტიკურ სტრუქტურებში საქართველოს ინტეგრაციას ალტერნატივა არ აქვს.
„ჩვენ გავაგრძელებთ ასოცირების შეთანხმების ეფექტიანი განხორციელებას. ეს მოიცავს ღრმა და ყოვლისმომცველი თავისუფალი ვაჭრობის სივრცის კომპონენტს. გაღრმავდება თანამშრომლობა ევროკავშირის ერთიანი უსაფრთხოებისა და თავდაცვის პოლიტიკის (ჩშDP) ფარგლებში. საქართველომ დაამტკიცა, რომ აქვს პოლიტიკური ნება და შესწევს უნარი, მნიშვნელოვანი წვლილი შეიტანოს საერთო ევროატლანტიკური უსაფრთხოების უზრუნველსაყოფად, რაც ჩვენი ქვეყნის სამხედრო მოსამსახურეების ავღანეთში მიმდინარე მტკიცე მხარდაჭერის მისიაში მონაწილეობით დასტურდება. ნატოში ინტეგრაციის დაჩქარების მიზნით: არსებული პრაქტიკული ინსტრუმენტების გამოყენებით მოვემზადებით ნატოს წევრობისთვის; გაგრძელდება ნატო–საქართველოს „არსებითი პაკეტის“ ეფექტიანი განხორციელება, რაც უზრუნველყოფს ქვეყნის თავდაცვისუნარიანობის განმტკიცებასა და ნატოსთან თავსებადობის ზრდას და ა.შ.“, – აღნიშნავს სესიაშვილი.
საგარეო პოლიტიკის მიმართულებით ერთიანი ნაციონალური მოძრაობის მთავარი პრინციპი ნატოსა და ევროკავშირში საქართველოს სრულუფლებიანი წევრობაა, რაც პარტიის სტრატეგიული მიზანია. ყოფილი სახელისუფლებო პარტიის ერთ–ერთი ლიდერი გიორგი ბარამიძე ხაზგასმით აღნიშნავს, რომ არჩევნებში გამარჯვების შემდეგ ევროპულ სტრუქტურებში ინტეგრაციის მიმართულებით ქვეყანა გააგრძელებს განუხრელ მსვლელობას და, დღევანდელი ხელისუფლებისაგან განსხვავებით, ახალ მთავრობას ექნება პრინციპული პოზიცია.
„ევროკავშირის სადამკვირვებლო მისიის პარალელურად ჩვენ გავაძლიერებთ ევროკავშირის ჩართულობას საქართველოს უსაფრთხოების განმტკიცებაში; საქართველოს შეიარაღებული ძალების საბრძოლო მზადყოფნის შემდგომი გაძლიერებისა და ნატოს შეიარაღებულ ძალებთან მათი ურთიერთქმედების გასაუმჯობესებლად, ნატოს ეგიდით და/ან ნატოს წევრ–სახელმწიფოებთან ერთად, ჩვენ მონაწილეობას მივიღებთ საქართველოსათვის ხელმისაწვდომ ყველა წვრთნასა და მისიაში“, – აცხადებს ბარამიძე.
რესპუბლიკური პარტიის ხედვით, ქვეყნის ევროპული ინტეგრაციის გზაზე საქართველოს ხელისუფლებამ ევროკავშირის წევრობა ოფიციალურად უნდა მოითხოვოს ევროკავშირის შეთანხმების 49–ე მუხლის საფუძველზე, რისთვისაც არსებობს ობიექტური საფუძვლები და საჭიროა ქვეყნის მთავრობის მიერ გამოხატული მკვეთრი პოლიტიკური პოლიტიკური ნება. რესპუბლიკელები ფიქრობენ, რომ ქვეყნის ევროატლანტიკური ინტეგრაცია, როგორც თვალსაწიერ მომავალში სახელმწიფოს განვითარების სტრატეგიული ვექტორი, კონსტიტუციურ პრინციპად უნდა იქცეს.
„იმისთვის, რომ ევროპა დაგვეხმაროს ქვეყნის აღმშენებლობაში და საქართველო გახდეს ევროპული ოჯახის თანასწორუფლებიანი წევრი, საჭიროა საქართველოს მიერ არჩეული ევროპის კავშირთან ინტეგრაციის პოლიტიკური კურსის წარმატებით განხორციელება, ევროკავშირთან ღრმა და ყოვლისმომცველი თავისუფალი ვაჭრობის შეთანხმების შესაძლებლობების ეფექტიანად გამოყენება. ამასთანავე ნატოსა და ნატოს წევრ ქვეყნებთან სტრატეგიული თანამშრომლობის მიმართულება და მოცულობა უნდა გაფართოვდეს. ნატოსა და ევროკავშირის სამშვიდობო ოპერაციებში საქართველოს შეიარაღებული ძალების ოპერაციებიდან ქვეყანამ მაქსიმალური სარგებელი უნდა ნახოს“.
ეროვნულ ფორუმში მიიჩნევენ, რომ საქართველომ უნდა გააგრძელოს ევროინტეგრაციისკენ სწრაფვა, თუმცა ქვეყანამ უნდა გაამახვილოს ყურადღება თავად რა სარგებლის მოტანა შეუძლია ნატოსა და ევროკავშირისათვის. პარტიის წევრი გელა გელაშვილი მიუთითებს, რომ ვინაიდან არსებობს რეგიონში დიდ მოთამაშეთა (აშშ, ევროპა, რუსეთი, თურქეთი, ირანი, ისრაელი, არაბული სამყარო, გარკვეულ წილად ჩინეთი) ურთიერთუნდობლობით გამძაფრებული კონკურენცია, საქართველოს ეძლევა შესაძლებლობა, გახდეს სამშვიდობო პროცესის დაწყების ინიციატორიც და მასპინძელიც.
„ნატოსა და ევროკავშირში საქართველოს გაწევრიანება სასიცოცხლოდ მნიშვნელოვანია. ჩვენ ძირითადად ვფიქრობთ ხოლმე რა სარგებელს მივიღებთ ამ ორგანიზაციებში გაწევრიანებით. ჩვენ ნატოსა და ევროკავშირის წევრი ვერასოდეს ვერ გავხდებით, თუ პარალელურად არ ვიფიქრეთ, რა სამსახური შეიძლება გავუწიოთ ამ ორგანიზაციებს“, – ამბობს გელაშვილი.
საქართველოს პატრიოტთა ალიანსი, ხელისუფლების სათავეში მოსვლის შემთხვევაში, გააგრძელებს ქვეყნის ევროატლანტიკურ სტრუქტურებში გაწევრიანების შეუქცევად პროცესს. ბლოკი „დავით თარხან–მოურავი, ირმა ინაშვილი – საქართველოს პატრიოტთა ალიანსი – გაერთიანებული ოპოზიციის“ წევრი გოჩა მამაცაშვილი ფიქრობს, რომ ამ პროცესის დროს საქართველოს ხელისუფლებამ ეროვნული ინტერესებიდან გამომდინარე უნდა იმოქმედოს.
„არჩევნებში გამარჯვების შემთხვევაში, საქართველოსთვის კვლავ პრიორიტეტი იქნება ნატოსა და ევროკავშირში გაწევრიანება, მაგრამ აქ აქცენტია გასაკეთებელი ფორმებზე, მეთოდებზე, დიპლომატიურ მიდგომებსა და დეტალებზე. ევროინტეგრაციის პროცესის დროს გავითვალისწინებთ ჩვენი მეგობარი ქვეყნების რჩევებს და ამავე დროს ვიმუშავებს რუსეთთან ნორმალური ურთიერთობის ჩამოყალიბებისთვის“, – აღნიშნავს მამაცაშვილი.
მოძრაობა „პაატა ბურჭულაძე სახელმწიფო ხალხისათვის“ მოსახლეობას გარანტიას აძლევს, რომ არჩევნებში გამარჯვების შემთხვევაში ევროატლანტიკურ სტრუქტურებში გაწევრიანების მიზნით ქვეყანაში მთელი რიგი რეფორმები გატარდება. პოლიტიკური მოძრაობის ერთ–ერთი წევრი ვანო გალახვარიძე მიიჩნევს, რომ საქართველოს წინაშე არსებული ვალდებულებების სრულყოფილად შესრულება ნატოსა და ევროკავშირში ქვეყნის გაწევრიანების მთავარი წინაპირობაა.
„ჩვენ უნდა გავწევრაინდეთ ისეთ სტრუქტურებში, სადაც საქართველოსთვის მეტი უსაფრთხოება და განვთარების შესაძლებლობა იქნება. ჩვენი ეკონიმიკის განვითარებისთვის და თანამედროვე ცხოვრებას რომ ავუწყოთ ფეხი, საქაეთველოს სჭირდება ევროკავშირის წევრობა. ქვეყანას უსაფრთხოებისათვის სჭირდება ნატო, რადგან ეს არის ერთადერთი ალიანსი, რომელიც ჩვენი გარშემომყოფი მეზობლებისაგან დაგვიცავს. ჩვენ გავხდებით ნატოსა და ევროკავშირის წევრი იმ შემთხვევაში, თუ ქვეყანა დაკისრებულ ვალდებულებებს სწრაფად და სრულყოფილად შეასრულებს“, – აცხადებს გალახვარიძე.
ნინო ბურჯანაძის პოლიტიკური გაერთიანება გამოდის ინიციატივით, რომ საქართველომ გამოაცხადოს უბლოკო სტატუსი. პარტიის ლიდერი, ნინო ბურჯანაძე მიიჩნევს, რომ საკონსტიტუციო კანონის მეშვიდე თავს უნდა დაემატოს მუხლი, რომლის თანახმად, საქართველო უარს იტყვის ნატოში ან სხვა რომელიმე სამხედრო ბლოკში გაერთიანებაზე. რამდენად შეძლებენ პოლიტიკური პარტიები თავიანთი საგარეო მიმართულებების მხარდაჭერას ,ეს არჩევების შემდეგ გახდება ცნობილი, როცა პარლამენტის დეპუტატები მთავრობას დააკომპლექტებენ.
სტატია მომზადებულია პროექტის ადგილობრივი მედია ინფორმირებული ახალგაზრდა ამომრჩეველისათვის. ფარგლებში, რომელიც ხორციელდება „მედია ცენტრი კახეთის“ მიერ.
